Улууспут ханнык баҕарар нэһилиэгэр дьон аныгылыы, куораттан итэҕэһэ суох толору хааччыллыылаах усулуобуйаҕа олорор кыахтаахтара көрөргө астык, олоҕу даҕаны биллэ чэпчэтэр. Эмис нэһилиэгин ытык кырдьаҕаһа, тыыл, үлэ бэтэрээнэ, 90-с хаарыгар сылдьар Евдокия Пестерева дьиэтигэр кыстыгы көрсө эмиэ толору хааччыллыы киирэн үөрүүтэ кэмэ суох.
Евдокия Егоровна кэпсииринэн, 90 сааһын көрсө саҥа дьиэ туттарар былааннаах эбит эрээри, кэккэ биричиинэлэринэн ол кыаллыбакка, оҕолорун көмөлөрүнэн дьиэтин толору хааччыллыылаах оҥорбуттар.
-Наһаа үчүгэй, сынньалаҥ эбит, мантан кыһын абыраныыһыкпын. Үлэтин барытын оҕолорум, сиэннэрим тиһэҕэр тиэрдэннэр, септик туруоран, утуйар хос оҥорон — барыта орун оннугар табылынна, аны сотору сиэннэрим бэлэхтэрэ өйдөөх таҥас сууйар массыына кэлиэхтээх ону күүтэбит. Онон оҕолорбор, сиэннэрбэр улахан махтал, кинилэр сүүрэн көтөн, сааһыран баран сылааска, толору хааччыллыыга олорор дьолун биллим,- диэн биир дойдулаахпыт, Эмис ытык киһитэ санаатын үллэстэр.
Түгэнинэн туһанан Евдокия Егоровна олоҕун, сөбүлүүр дьарыгын туһунан кэпсээн ааһыым.
Евдокия Егоровна Пестерева 1935 сыллаахха Ураһалаах алааһыгар төрөөбүтэ, онтон үөрэнэ Күөрэлэҕэ киирбитэ. Уоттаах сэрии саҕаланарыгар 6 саастаах оҕо этэ, бастакы ыҥырыыга убайа Өлөксөй түбэспитигэр, саллааттары барыларын грузовой массыынаҕа тиэйэн барбыттарын, кинилэри кырачаан Дуня ийэтинээн атаарбыттарын субу баардыы өйдүүр. Оттон оҕо сааһын биир саамай чаҕылхай, умнуллубат түгэнинэн Кыайыы ыһыаҕын ыспыттара буолар: „Мин оскуолаҕа үөрэнэрим, Бүөтүр Өндөрөйөбүс Захаров салаайааччынан олорбута, кинилэр сүөһү өлөрөн эт буһаран сиэпиттэрэ уонна иккилии устуука ньолбоҕор бирээнньик, түөт муннуктаах кэмпиэт оҕолорго нуормалаан үллэрэн биэртэрэ“,- диэн ол минньигэс амтана билигин даҕаны айаҕар биллэрин наһаа истиҥник ахтар.
Евдокия Егоровна Улуу Кыайыы 80 сылыгар 90 сааскын туолар, оттон уһун үйэлэнии кистэлэҥэ тугуй диэн ыйыппыппар бу курдук этэр:
-Ээ миэхэ туох кистэлэҥэ кэлиэй? Дьиэҥ иһигэр уу нуурал олох баар буоллаҕына, оҕолоруҥ куруук дьоллоохтук олордохторуна уонна доруобуйа кэминэн буоллаҕына киһи үчүгэйдик сылдьар буоллаҕа. Мин уонна куруук ырыаны кытта сылдьабын – бэйэм да ыллыыбын, сахалыы ырыалары сөбүлээн истэбин, таптаан истэр ырыаһыттарым эдьиий Марыына, Ольга Иванова, Клавдия Онуфриева буолаллар. Кыра сырыттахпын Ураһалаахха эдьиийим патифонун холбоон баран, арыллар түннүк аттыгар туруоран, үлэлии-үлэлии Русланова ырыатын кыргыттар таптаан истэрбит. Онтон ыла ырыаны сөбүлүүр, ыллыыр буолбутум.
Ырыаҕа тапталы Евдокия Егоровна олоҕун устата илдьэ кэллэ. Ольга Саввична Михайлова салайааччылаах „Көлүкэчээн“ ансаамбылга дьарыктаммыта 20 сыл буолла. Ситиһиилэрэ даҕаны аҕыйаҕа суохтар, арай быйыл кэлэрбин-барарбын ыарырҕатар буоллум, онон тохтуур санаа киирэр диэн этэр:
-90 сааспын „Көлүкэчээн“ ансаамбыллар хайаан да бэлиэтиэх буолбуттара, онон үбүлүөйбүн ылан баран сынньалаҥҥа барарым буолуо,- диэн кэпсээннээх Эмис нэһилиэгин ытык кырдьаҕаһа Евдокия Егоровна Пестерева.
Эрчим Николаев, „Кэскил“ хаһыат эдэр кэрэспэдьиэнэ, Эмис нэһилиэгэ.