Сулҕаччыга Россияҕа Дьиэ кэргэн, Саха сиригэр Оҕо саас сыллларыгар аналлаах бэртээхэй тэрээһиннэр буолан аастылар. Спортивнай күрэх, үҥкүү киэһэлэрэ нэһилиэк дьонун түмтүлэр.
Бастатан туран И.И. Константинов-Дэлэгээт Уйбаан аатынан Сулҕаччы орто оскуолатын дьаһалтата уонна физкультура учуутала, спорт энтузиаһа, СӨ ыччат политикатын туйгуна, СӨ физическэй культураҕа уонна спорка туйгуна, 2015 уонна 2019 сылларга „Амма улууһун бастыҥ учуутала“ аат хаһаайката Сардаана Христофорова көҕүлээһиннэринэн “Ийэ оҕотунаан” спортивнай күрэх бэрт тэрээһиннээхтик ааста.
Оскуола алын кылааһын үөрэнээччилэрэ пионербол оонньоотулар, манна кылаас оҕолоро уонна ийэлэр бары кыттыыны ыллылар. Түмүк маннык буолла : 1-кы миэстэ уолаттар, 2-с миэстэ кыргыттар, 3-с миэстэ ийэлэр. Орто сүһүөх кылаас үөрэнээччилэрэ ийэлэрин утары хамаанда туруоран волейбол оонньуутугар күрэхтэстилэр. Ыһыылаах-хаһыылаах, “ыалдьааһыннаах” күрэххэ 1-кы миэстэни уолаттар, 2-с миэстэни ийэлэр, оттон 3-с бочуоттаах миэстэҕэ кыргыттар хамаандалара таҕыстылар.
Онтон Х.Максимов аатынан кулуупка (директор Жанна Максимова) “Ийэ оҕотунаан» диэн ааттаах дьоҕус, ол эрээри олус сэргэх кэнсиэр буолан ааста. Культура дьиэтигэр быйыл саҥа хореограф үөрэҕи бүтэрэн кэлэн үлэлээн эрэр. Онон ийэлэргэ, оҕолорго омук эгэлгэ үҥкүүтүн туруорбутун астына көрдүбүт. Ол курдук, Милена уонна ийэтэ Людмила Борисовалар “Испанскай”, Карина Неустроева уонна эбэтэ Антонина Неустроева “Узбекскай”, Дайаана уонна ийэтэ Жанна Максимовалар “Уйгурский цветок”, онтон Анита уонна ийэтэ Анна Баишевалар “Чараҥ вальса”, Настя уонна ийэтэ Мария Степановалар “Дьиэрэҥкэй” үҥкүүлэрин биир тыынынан көрөн дуоһуйдубут. Үҥкүүлэрин сэргэ Вероника Максимова кыргыттара Алисияны, Эльзаны уонна Анна Носова оҕолорун Афоняны, Василинаны уонна Виталийы кытта ырыаларын бэлэхтээтилэр. Кэнсиэри Веня уонна ийэтэ Татьяна Сунхалыровтар иилээн-саҕалаан ыыттылар. Нүөмэрдэр быыстарыгар ийэлэр күннэринэн араас бириистээх оонньуу ыытылынна. Көрөөччүлэр да, кыттааччылар да улаханнык астынан, үөрэн тарҕастылар.
Елена Попова.