Хас биирдии киһи ис кутугар күннээх буолар. Ол күн – үтүө санаа. Үтүө санаа, атын киһиэхэ өйөбүл, кини кыһалҕатын бэйэ киэнин курдук ылыныы, аһыныгас өрүт, амарах сыһыан – бу өйдөбүллэр киһини Киһи оҥороллор. Маныаха, бу үтүө өйдөбүллэри кыра оҕо эрдэхтэн иҥэрии, үөрэтии-такайыы – иитии сүрүн өрүттэриттэн биирдэстэрэ буолаллар. Ол курдук, сааһырбыт көлүөнэ дьон ытыктыыр убаастыыр учууталбыт Е.Е.Пахомов аатын сүгэр Болугур орто оскуолатын оҕолоро улааттахтарына туох идэлээх, ханнык сололоох үлэһит буолан тахсыахтарын билбэтэрбин да, кинилэр хайаатар да тулаларыгар үтүөнү саҕар, аҕам саастаах дьоҥҥо ытыктабыллаах, кыаммакка-ыарыһахха аламаҕай сыһыаннаах дьон буола үүнүөхтэрэ диэн бүк эрэллээхпин.
Болугурбут оскуолатын 7, 8 кылаастарын үөрэнээччилэрэ кылаас салайааччылара Наталья Семеновна Кузьмина, Зоя Арсениевна Корнилова салалталарынан, кыраҕы болҕомтолорунан сынньалаҥ күннэрин аахсыбакка, икки өрөбүллэригэр анаан-минээн кэлэннэр уокка оттор маспын хайытан, саһааннаан, күүлэбэр кыстаан соҕотох олорор сааһырбыт киһиэхэ улахан күүс-көмө буолуллар. Тыа сирин ыалын оҕолоро буоланнар, үлэни кыраларыттан билэ-көрө улаатан эрэр уолаттар «тып-тап» курдук туттан-хаптан, үлэлээн-хамсаан көрүөх бэтэрээ өттүгэр бүтэрэн-оһорон, ыпсаран кэбистилэр. Төһө да аныгы олох тутула уларыйа-тэлэрийэ турдар, сойуус саҕанааҕы тимуровскай хамсааһын орто оскуолабытыгар тигинэччи үлэлии олорорун көрөммүт биһиги – саастаах көлүөнэ дьон үөрэбит, киэн тутта кэпсиибит.
Түгэнинэн туһанан, Болугур орто оскуолатын салалтатыгар, педагогическэй кэлэктиибигэр, чуолаан көрдөһүүбүтүн быһа гыммакка хамсааһыны тэрийбит педагог-тэрийээччи Анна Васильевна Ивановаҕа, кылаас салайааччыларыгар Наталья Семеновна Кузьминаҕа, Зоя Арсениевна Корниловаҕа хайа да күүстээх үлэни тулуппат дьон буола улаатан эрэр уолаттарга ис сүрэхпиттэн дириҥ-истиҥ махталбын тириэрдэбин. Төрөппүттэр кэннэ биллэн турар, кылаас салайааччыта үөрэнээччилэргэ иккис Ийэ буолар. Наталья Семеновна, Зоя Арсениевна кылааскыт оҕолорун кытары оскуоланы түмүктүөхтэригэр диэри биир өйүнэн-санаанан салайтаран этэҥҥэ улахан олох суолугар атаараргытыгар, үлэһит уолаттарбар бүгүҥҥүгүт курдук куруук «үлэ – үөрүү, үлэ – дьол, үлэ – үүнэр, сайдар суол» дэбииһинэн салайтаран сылдьаргытыгар баҕарабын. Үтүө санаалаах дьоммун үүнэн эрэр 2025 сылынан итиитик-истиҥник эҕэрдэлиибин! Саҥа сыл саҥа саҕахтары арыйан истин, туйгун үөрэҕи, таһаарыылаах үлэни, чэгиэн доруобуйаны, дьиэ-кэргэттэргитигэр үтүөнү-үйэлээҕи аҕаллын.
Мария СОФРОНОВА, СӨ бочуоттаах бэтэрээнэ, Амма улууһун уонна Болугур нэһилиэгин бочуоттаах олохтооҕо, норуот хаһаайыстыбатын үтүөлээх үлэһитэ