Амма улууһун бэтэрээннэрин Сэбиэтин быйылгы былаанынан улуус нэһилиэктэриттэн актыбыыс аҕам саастаахтар мустан Дьокуускай куоракка киирэн экскурциялаан кэллилэр. Өр Сахабыт сирин киин куоратын көрбөтөх дьон бэркэ астыннылар, сэргэхсийдилэр.
“Биһиги бу ааһан эрэр сылбыт былааныгар олоххо көхтөөх, ыытыллар тэрээһиннэргэ куруутун кыттар аҕам саастаах дьоммутун Дьокуускай куораппыт бэлиэ сирдэринэн сырытыннарыы киирбитэ. Дьэ ол быһыытынан улууспут нэһилиэктэриттэн 9 аҕам саастаах далбар хотуттар буолан “Саха сирин күндү баайын судаарыстыбаннай харала” быыстапкатыгар сырыттыбыт. Судаарыстыбаннай хааһына тэрилтэтин иһинэн көмүс, алмаас пуондатын уонна оҥоһуктарын дьоҥҥо-сэргэҕэ көрдөрөр, иһитиннэрэр салаа салайаачыта, биир дойдулаахпыт, Эмистэн төрүттээх Андрей Петрович Захаров бэркэ иҥэн-тоҥон кэпсээн, интэриэһи тардан туран сырдатта. Маны таһынан “Царство вечной мерзлоты” музейга, саҥа тутуулардаах Орджоникидзе, Ленин болуоссатыгар, уоттаах Саҥа дьыллааҕы дьоллоох Дьокуускай куоракка астына-дуоһуйа сырыттыбыт.
Бу бэлиэ күнү бэлэхтээбит дьоммутугар Амма улууһун дьаһалтатыгар, баһылык Степан Николаевич Кузьмиҥҥа, дьаһалта хаһаайыстыбатын салайар сулууспа салайааччытыгар Игорь Николаевич Никитиҥҥа, көмүс, алмаас пуондатын көрдөрөр, иһитиннэрэр салаатын салайааччытыгар Андрей Петрович Захаровка, сымнаҕас айаннаах суоппарбытыгар Федор Гаврильевич Артемьевка дириҥ махталбытын тиэрдэбит! Кинилэргэ кытаанах доруобуйаны, ситиһиилэри, дьолу, этэҥҥэ буолууну баҕарабыт! Дьоммут бэркэ сэргэхсийэн, Саха Сиригэр олорор аата бэйэбит үчүгэйбитин бачча сааспытыгар диэри көрбөккө,күөх экирээн эрэ нөҥүө көрөр эбит буоллахпытына, дьэ илэ көрөн, өссө хаартыскаланан үөрэн көтөн,астынан дуоһуйа сынньанныбыт, күндү металлар быыстапкаларын көрөр баҕа санаабыт дьэ туолла диэн олус махтанан туран эттилэр, суруйдулар даҕаны. Онон биһиги тэрийээччилэр эмиэ астынабыт”, — диэн Амма улууһун бэтэрээннэрин Сэбиэтин бэрэссэдээтэлэ Мария Захарова сырдатта.
“Амма олоҕо” хаһыат