Сэргэ Бэс оскуолатыгар сылын ахсын ыытыллар «Чтение — лучшее учение» бырайыак чэрчитинэн «Книга на сцене» инсценировка күрэҕэ оскуола бибилэтиэкэлэрин Аан дойдутааҕы күнүгэр буолан ааста.
Оҕо ааҕар дьоҕурун сайыннарыыга биһиги оскуолаҕа «Чтение — лучшее учение» библиотека бырайыага 2016 сылтан үлэлиир. Манна уһуйаан уонна оскуола оҕолоругар дорҕоонноохтук ааҕыы күрэҕэ, дьиэ кэргэнинэн «Книга на сцене» театрилизованнай оонньоон көрдөрүү буолар.
Үөрэх дьылыгар үс этап ыытыллар: «Книга на сцене» оскуола оҕолоругар инсценировка күрэҕэ, «Кырыа кыһын ааҕыылара» детсад оҕолоругар хоһоон ааҕыытын күрэҕэ уонна «Сааскы дорҕооннор» Улуу Кыайыы күнүгэр ыытыллар хоһоон күрэҕэ.
Күрэхпит сүрүн сыалынан-соругунан оҕону уус-уран айымньыга сыһыарыы, айымньыны истэргэ, тылга болҕомтолоох буолууга иитии, оҕо тус олоҕун айымньы нөҥүө сиэр-майгы сыаннастарынан байытыы, дьиэ кэргэнинэн ааҕыы үгэстэрин тэрийии, оҕоҕо ааҕыы култууратын сайыннарыы буолар.
Быйылгы 8-с төгүлүн ыытыллар күрэхпит Россияҕа Дьиэ кэргэн, Саха сиригэр Оҕо саас, Амма улууһугар Олоҥхо сылыгар уонна үбүлүөйдээх суруйааччыларга ананна. Кыттааччылар бука бары бэркэ тэринэн, бэлэмнэнэн кэлбиттэрэ харахха быраҕыллар. Ол да буоллар, күрэх аата – күрэх, кыайыылаах баар буолуохтаах. Дьүүллүүр сүбэ быһаарыытынан түмүк маннык таҕыста: кыра кылаастарга 1 миэстэ – 2 кылаас (салайааччы Ольга Иннокентьева) юбиляр, фронтовик суруйааччы Тимофей Сметанин төрөөбүтэ 105 сылыгар «Куоска уонна Саһыл» хоһоонугар олоҕуран инсценировка, 2 миэстэ – 1 кылаас, (салайааччы Наталья Васильева) «Таал-Таал эмээхсин» остуоруйа, 3 миэстэ – 3 кылаас (салайааччы Александра Борисова) «Таба уонна ыт» остуоруйа.
Улахан кылаастарга 1 миэстэ –8 кылаас (салайааччы Ньургустана Борисова) Суорун Омоллоон «Бэйэ эмтиэкэ», 2 миэстэ – 6 кылаас (салайааччы Елена Иванова) юбиляр, фронтовик суруйааччы Тимофей Сметанин «Күөрэгэй» остуоруйата, 3 миэстэ – 9 кылаас (салайааччы Прокопий Иннокентьев) Николай Заболоцкай – Чысхаан «Хоһууттар».
Маны сэргэ кулууп коллектива олохтообут «Көрөөччү биһирэбилэ» анал аат хаһаайыннарынан 2 кылаас үөрэнээччилэрэ ыллылар, кылаас салайааччыта — Ольга Иннокентьева.
Күрэх түмүгүнэһ сылын аайы оҕолор оонньуулара тупсан иһэр диэн бэлиэтии көрдүбүт уонна быйыл Дьиэ кэргэн сылынан элбэх төрөппүт кыттыбыта үөртэ. Бу бырайыакка ыкса сибээстээхтих кылаас салайааччылара, иитээччилэр, төрөппүттэр уонна олохтоох библиотекарь Устинья Конникова, кулууп сэбиэдиссэйэ Светлана Федотова бииргэ үлэлэспиттэригэр түгэнинэн туһанан махталбытын тиэрдэбит.
Розалия Никифорова, М.Н. Сибиряков аатынан Сэргэ-Бэс оскуолатын педагог-бибилэтиэкэрэ.