Бэҕэһээ Абаҕа нэһилиэгэр саҥа бурдук ыскылаатын үлэҕэ киллэрдилэр. Биир тыһыынча туонна бурдугу харайар ыскылаат лоп курдук хомуур үлэтэ бүтэрин баттаһа тутулунна. Бу күн улуус дьаһалтатын, култуура управлениетын уонна Амматааҕы бибилэтиэкэ үлэһиттэрэ оптуобус сиһэ кэдэйиэр диэри лыык курдук симсэн тиийэн бурдук кууллаан хаһаайыстыбаҕа көмөлөстүлэр.
Улуус баһылыга Степан Кузьмин маннык ыскылааттар бурдугунан дьарыктанар хаһаайыстыбаларга туһалаахтарын ыйан туран салгыы тутары туруорсуохпут диэн эттэ: “Тыа хаһаайыстыбатын министиэристибэтэ бырагыраамматынан улууспутугар быйыл икки ыскылаат тутулунна. Абаҕаны таһынан Покровкаҕа эмиэ биир тыһыынча туоннаҕа анамммыт ыскылаат. Бурдугунан дьарыктанар хаһаайыстыбаларга бу туһалаах эбийиэктэр. Эһиил даҕаны ыскылаат тутуутун туруорсуохпут”. Ыскылааты кылгас кэм иһигэр тутан биэрбит урбаанньыт Арман Терешин, Семен Иванов уонна саҥа эбийиэк хаһаайыныгар Василий Тимофеев улуус баһылыгын Махтал суруктарын туттулар.
Чопчу маннык тутуулары уонна техникалары үллэриини сүрүннүүр Тыа хаһаайысыбатын министиэристибэтин үүнээйини үүннэриигэ уонна мелиорацияҕа Департамынан салайааччы Вячеслав Гаврильев тылыттан биллэххэ, ыскылааттары тутар анал бырагыраамма саҥардыы иккис сылын үлэлиир эбит. Бу иннинэ Өлүөхүмэҕэ уонна Уус Алдаҥҥа обургу соҕус ыскылааттары туппуттар. Амма улууһа бурдугунан дьарыктанар бөдөҥ хаһаайыстыбалардаах улуус буоларын быһыытынан салгыы үбүлээһин баар буолуоҕа диэн эрэннэрдэ. Вячеслав Владимирович “Илгэ” хаһаайыстыба тырахтарыыһа Алексей Романовка уонна ыскылаат үлэһитэ Андрей Прокопьевка СӨ тыатын хаһаайыстыбатын министиэристибэтин Махтал суруктарын туттарда.
“Илгэ” хаһаайыстыба улуус үрдүнэн саамай элбэх үүтү туттарар хаһаайыстыба, көрдөрүүлэрэ сылтан сыл тупсан иһэр. Бары былааннарын мэлдьи толороллор”, — диэн улуустааҕы тыа хаһаайыстыбатын управлениетын салайааччы Ион Кононов хайҕаан туран хаһаайыстыба мэхээнньигэ Егор Михайловка Амма улууһугар тыа хаһаайыстыбата сайдарыгар сүҥкэн өҥөтүн иһин түөскэ анньыллар бэлиэни кытары Махтал суругун туттарда. Маннык Махтал суруктарга хаһаайыстыба салайааччыта Василий Тимофеев, тырахтарыыс Алексей Павлов уонна аграном Ньургун Петров тигистилэр.
Абаҕаҕа Василий Васильевич Тимофеев салайар хаһаайыстыбатыгар быйылгы дьыл табыллыы аргыстаах ааһан иһэр. Бааттара кэмэ суох элбэх ситиһиинэн, кыайыынан тото хадаҕалаата. Ол курдук бу сайын сылгынан дьарыктанар Строд аатынан хаһаайыстыбалара Арассыыйа таһымнаах сылгы собуотун аатын сүгэн сүргэлэрэ өрө көтөҕүллэр. Үөрүүлэрин уххана сойо илигинэ сүүрүүк аттара Ламан Леча Ил Дархан кубогын аҕалар. Онтон бурдугунан дьарыктанар “Илгэ” хаһаайыстыбалара СӨ тыа хаһаайыстыбатын министиэристибэтин анал бырагыраамматыгар хапсан бу саҥа ыскылаат тутуллан киирдэ. Хаһаайыстыба быйыл бурдуктарын, отторун былааннарын таһынан бычылыйыар диэри толорон кыстыгы этэҥҥэ туоруурга эрэллэрэ улахан. Онон, барыта санаа хоту сатаннын, баҕа хоту табылыннын.
Олег ЕГОРОВ