А.Е. Кралин аатынан Абаҕа орто оскуолатыгар ааспыт нэдиэлэ музыка кэрэ эйгэтигэр ананна. Музыка дьикти, кэрэ алыптаах күүһэ ханнык баҕарар киһи үтүөҕэ, сырдыкка талаһарыгар төһүү күүс буолар.
Алтынньы 3 күнүгэр оскуолабыт аактабай саалатыгар үөрэнээччилэр, үлэһиттэр уонна төрөппүттэр ураты кэрэ, нарын музыка эйгэтигэр ыалдьыттаатылар. Бу дьоро киэһэҕэ Амматааҕы А. А. Черемных аатынан оҕо искусствотын дьиэтин преподавателэ Робелла Артемьева биир чаас устата “Неоклассика” диэн аныгы киинэлэр саундтректарынан фортепианнай кэнсиэри бэлэх уунан, барыбытын олус үөртэ, долгутта, дуоһутта. Уонунан чүмэчи симик уотунан сырдатыллыбыт сыанаттан, фортепианоҕа оонньуу олорор эдэркээн кыыс киһи дууһатын ис кылларын таарыйар нарын-намчы музыкатын айан таһаарара, истээччилэр куттарын тутуон тутта.
Алтынньы 4 күнэ -‘биһиги оскуолабытыгар Учуутал күнүгэр ананна. Сарсыардаттан учууталлары, үлэһиттэри төрөппүт Роберт Захаров салайааччылаах үөрэнээччилэр вокальнай-инструментальнай ансаамбыллара эҕэрдэлии көрүстэ. Ол курдук таһырдьаттан киирэр аан утары, холлга оҕолор музыкальнай инструменнарга оонньоон, сахалыы, нууччалыы ырыалары ыллаан көрсүүлэрэ хас биирдии үлэһити, оҕолору улаханнык үөртэ, долгутта.
Киэһэтигэр У.Г. Нохсоороп аатынан Духуобунас киинигэр “Ылбаҕай ырыа ылланнын ыччакка” диэн ааттаах Учуутал күнүгэр аналлаах уһуйааччылар Галина Прокопьевна Петрова, Татьяна Филипповна Антонова, Анна Васильевна Дьячковская айар киэһэлэрэ үрдүк таһымнаахтык буолла. Бу киэһэ мелодист педагогтарбыт урукку да ырыалара ылланнылар, сабыс-саҥа ырыалар да сүрэхтэннилэр.
Татьяна Антоноваҕа Саха Өрөспүүбүлүкэтин мелодистарын сойуустарыгар киирбитин туһунан дастабырыанньаны нэһилиэкпит баһылыга Максим Семенов туттарда.
Дьоро киэһэҕэ кыттыыны “Мичил” уһуйаан иитиллээччилэрэ, оскуола үөрэнээччилэрэ, участактааҕы балыыһа, “Сыдьаайа” оскуола үлэһиттэрин уонна “Кыыс Амма” народнай ансаамбыллара,ылбаҕай ырыаһыттар Екатерина Яковлева, Наталья Аргунова, Мотрена Порядина, Юлия Петрова, Попова Евгения Николаевна салайааччылаах “Маска” театральнай студия иитиллээччилэрэ, “Эрэл” (салайааччылар Оксана Борисова, Сахая Попова), “Түмэн”(салайааччы Елена Тритонова) үҥкүү ансаамбыллара ыллылар. Айар куттаах мелодистарбытыгар иэйиигит хаһан да уҕараабатыгар, ырыаларгыт ыллана туралларыгар, саҥаттан саҥа ырыаларгытын дьоҥҥутугар-сэргэҕитигэр бэлэх ууна тураргытыгар баҕарабыт.
Онон бу нэдиэлэ олус кэрэхсэбиллээхтик, музыка кэрэ эйгэтин кытта ыкса ситимнээхтик ааста.
Мария Адамова, Абаҕа орто оскуолатын саха тылын уонна литературатын учуутала.