Абаҕа нэһилиэгин Үрүҥ Тунах ыһыаҕар, Саха сирин эти-хааны чэбдигирдии уонна күөн күрэс эйгэтин туйгуна, «Дьонун-сэргэтин иннигэр килбиэнин иһин» мэҥэ бэлиэ басхана, Абаҕа нэһилиэгин бочуоттаах олохтооҕо, Абаҕабыт дьонун-сэргэтин күүскэ түмпүт уонна дойдубутун сайыннарбыт ытыктыыр баһылыкпыт, Макар Тимофеев үтүө аатын үйэтитэр хапсаҕай күрэҕэ ыытылынна.
Амма спордун өрө таһаарыыгар күүскэ үлэлээбит Макар Тимофеев сырдык аатыгар ыытыллыбыт күрэхпит кыайыылаахтарын билиһиннэрэбит. Ол курдук 70 киилэҕэ диэри ыйааһыннаахтарга бастакы миэстэни Амматтан Дмитрий Шестаков, иккис миэстэни Бөтүҥтэн Мичил Попов, үһүс миэстэни Чапчылҕантан Дархан Каримов ыллылар. 70 киилэттэн үөһээ ыйааһыннаахтарга Эмистэн Александр Ларионов чөмпүйүөннээтэ. Иккис миэстэ Амматтан Айаал Алексеев, үһүс миэстэ эмиэ Амматтан Николай Гермогенов буоллулар. Көҥүл тустууга күөн күрэскэ Макар Ильич бииргэ үөрэммит, тустубут, үлэлээбит уонна алтыспыт доҕотторо бары кыттыһаннар 125000 солкуобайы уу харчынан хомуйан, 100 000 солкуобайы кыайыылаахтарга, 25 000 солкуобайы күрэхтэһии тэрээһинигэр туттардылар. Бары кыайыылаахтар 25 000 солкуобайы, иккис миэстэҕэ тахсыбыттар 15 000 солкуобайы, үһүс миэстэлээхтэр 10 000 солкуобайынан наҕараадаланнылар. Маны таһынан күрэхтэһии кыттыылаахтарыгар элбэх анал бириистэр туттарылыннылар.
Ол курдук ИП Окороков Альберт Гаврильевич туруорбут «Окна стандарт» 20000 солк. Сертификатын Дархан Каримов, ИП Гермогенов Иван Вячеславович туруорбут «GERIV» маҕаһыын 5000 солк. сертификатын (барыта холбоон 30000 солк.) Дмитрий Шестаков Дмитрий, Мичил Попов, Семен Лукин, Александр Ларионов, Айаал Алексеев, Николай Гермогенов Николай ыллылар. Амма нэһилиэгэ туруорбут аэрофритюрницаларын күрэхтэһии кыайыылаахтарыгар Шестаков Дмитрийга уонна Ларионов Александрга, ыһыахпыт уонна күрэхтэһиибит ытык ыалдьыта, Амма нэһилиэгин баһылыга Михаил Артемьев туттарда.
ИП Дьулустан Горохов туруорбут «Чокуур» маҕаһыын Саха быһаҕын күрэх кыайыылааҕа Александр Ларионов ылла. Макар Ильич аймахтара туруорбут 25000 солк. уу харчынан анал бэлэхтэрин Валентин Бурнашевка уонна 10 000 солк. уу харчынан анал бэлэхтэрин Вадим Неустроевка туттардылар. Бу күрэхтэһии тэрээһинигэр көмөлөспүт биир дойдулаахтарыгар уонна доҕотторугар-атастарыгар Макар Ильич дьиэ кэргэнэ барҕа махталларын тиэрдэллэр.
Бойуот уола Айылгын