Үөрэх уонна наука миниистирэ Ньургуна Соколова салайааччылаах Бырабыыталыстыба чилиэннэрин Амма улууһугар отчуоттуур иккис бөлөҕө олунньу 6 күнүгэр үлэтин Абаҕа нэһилиэгиттэн саҕалаата. Нэһилиэнньэ көхтөөх кыттыыны ылан саамай сытыытык турар кыһалҕаларын туруорустулар. Олортон сүрүннэригэр тохтоон ааһыахха.
Улуус биир бөдөҥ нэһилиэгин олохтоохторо киин ититэр ситимҥэ холбонууну туруорустулар. Чуолаан, элбэх анал байыаннай дьайыы кыттыылаахтарын дьиэ кэргэттэрэ олорор «Хатыҥчаан» уулуссаҕа тиэрдэр уолдьаспытын элбэх киһи этиннэ.
Массыына айанныыр суолун туруга мөлтөҕө, өрөмүөн даҕаны кэннэ көммөтө ахтылынна. Маны тэҥэ муосталары саҥардыы ирдэнэрин ыйдылар.
Ил Дархан Сорудаҕынан 2023-2024 сылларга саҕаланыахтаах спортивнай саала тутуута олоххо киирбэтэҕин олохтоохтор аҕыннылар. Бу боппуруос оннуттан сыҕарыйарыгар сүбэлэри көрдөөтүлэр.
Абаҕалар ордук элбэх ыйытыыны тыа хаһаайыстыбатын салаатыгар биэрдилэр. Инники 10-20 сыл тыа хаһаайыстыбата хайдах, ханнык хайысханан сайдыаҕын ыйыталастылар. Сүөһүгэ субсидия көрүллэр эбит буоллаҕына, сылгыны иитиигэ тоҕо суоҕун туоһуластылар. Маны тэҥэ агрооскуолалар кэтэх хаһаайыстыбаларыгар судаарыстыбаттан көмө оҥоһуллар механизмын тобулар наадатын ыйдылар. Өр сыл ыанньыксытынан, сылгыһытынан үлэлээбит дьон 50 саастарыгар биэнсийэҕэ тахсалларын ситистэхпитинэ эрэ тыа хаһаайыстыбатыгар эдэр ыччат кэлэрэ ситиһиллиэҕин эттилэр. «Агростартап» үлэлээбитэ, сүөһү төбөтүгэр субсидия көрүллэр буолбута хас даҕаны сыл буолла эрээри, сүөһү ахсаана лаппа аччыы турар. Онон сиэттэрэн субсидияны үүккэ көрөн балаһыанньаны уларытарга этии киллэрдилэр.
Байыаннай дьайыы бэтэрээнин чэпчэтиилэрэ (үөрэххэ туттарсыы, уопсайынан хааччыйыы, стипендия) тоҕо анал байыаннай дьайыы кыттыылааҕар эрэ тарҕанарын, Афганистан, Чечня сэриитин кыттыылаахтарыгар көрүллүбэтин ыйыталастылар. Манна болҕомтону туһаайан, сокуоҥҥа уларытыы киллэрэр наадалааҕын боротокуолга киллэрэри туруорустулар.
Тыа сиригэр ыччат олохсуйарыгар олорор дьиэнэн хааччыйыы улахан оруолу ылар. Онон уопсай дьиэни тутуу олус наадатын хас да киһи эттэ-тыынна.
«Саһыл сыһыы» историческай комплекс чөлүгэр түһэригэр олус улахан үлэ ыытылынна. Маны көрөргө-истэргэ үлэһит көрүллүөн наадатын абаҕалар туруорустулар.
Баһаары утары ыытыллар тэрээһин ирдэбилинэн хас биирдии нэһилиэккэ 50 кууптаах емкость хас 200 миэтэрэ эргимтэлээх сиргэ туруохтаах. Бу — олохтоох дьаһалта бэйэтин күүһүнэн кыайбат улахан, элбэх үбү эрэйэр үлэтэ, онон өрөспүүбүлүкэ салалтатын өттүттэн ирдэбили намыратар наадатын күүскэ туруорустулар, боротокуолга киллэртэрдилэр.
Манна барытыгар Ньургуна Афанасьевна хамаандата сөптөөх эппиэттэри, сүбэлэри биэрэннэр икки өттүттэн хорутуулаах кэпсэтии таҕыста.
«Амма олоҕо» хаһыат