Ахсынньыбыт дьэ чахчы да аан даам тымныыта, бурҕалдьыйар тумана түһэн турдаҕына Амма нэһилиэгэр Давыдовтар дьиэ кэргэн түннүктэриттэн сибиэһэй, кытара буспут помидору быһан сиэтилэр. Онтон бэтэрээн учуутал, 86-с хаарыгар үктэммит Софья Петровна Скрябинаҕа помидору сэргэ өссө хризантема сибэккилэр силигилии үүнэллэр.
Сатаан үүннэрэр, сатабыллаах оҕуруотчут уонна сылаас сүрэхтээх буоллаххына, таһырдьа 50-тан тахса кыраадыс да буоллаҕына, түннүккэр помидор үүннэрэн, өссө кытара буспуту да быһыахха сөп эбит. Ол курдук Амма нэһилиэгин олохтооҕо, улуустааҕы үөрэх салаатыгар сүрүн исписэлииһинэн үлэлиир Эмма Давыдова бу саамай тымныы күннэр түһэн турдахтарына, түннүгэр помидора ас кута турар. Онтон ийэтэ, биология учууталынан өр сылга үлэлээбит, 86- хаарыгар үктэммит Софья Петровна букатын да соторутааҕыта кытара буспут помидору быспыта.
“Бу күһүн иһиккэ үүннэрбит помидорбун киллэрэн салгыы түннүккэ ууран үүннэрэн турабын. Бытархай астаах, “Балконное чудо” диэн сорт. Сайын эмиэ наһаа үчүгэйдик ас куппута. Биһиги маннык иһиккэ үүнэр сортары, күһүҥҥүнэн бүтэрбэккэ, салгыы киллэрэн үүннэрбиппит син хас да сыл буолла. Быйыл да эмиэ киллэрэн үүннэрэ турабыт. Тымныы кыһын диэн аахсыбакка, таһырдьа 53 кыраадыс диэбэккэ, хата ас кута турарыттан бэйэм да сөҕөбүн уонна астынабын. Туох да анал лаампа игин суох. Күн сырдыгынан тураллар. Астара бэрт минньигэстэр. Онтон Абаҕаҕа олорор ийэм помидора кытара буһа турар. Киниэхэ өссө хризантема сибэккилэрэ наһаа үчүгэйдик сибэккилии тураллар. Ону көрөн таһырдьа аан даам тымныы дии санаабаккын ээ”, — диэн Эмма Валерьевна санаатын үллэһиннэ.
Дьэ ити курдук сылаас сыһыан, кыһамньылаах көрүү баар буоллаҕына, теплицаҕа эрэ буолбакка, кыһыннары түннүккэ помидор үүннэриэххэ сөп эбит.
«Амма олоҕо» хаһыат