Амма Наахара нэһилиэгэ тыытыллыбатах айылҕалаах, ыраас уулаах, таас очуостардаах кэрэ сиринэн биллэр. Манна олорор-үлэлиир дьон айылҕаларыгар сөп түбэһэр үтүө-сайаҕас санаалаахтар. Алтынньы 14 күнүгэр Амма Наахара нэһилиэгин «Түмэн» сынньалаҥ киинэ быйылгы үлэ сезонун аһымал аахсыйа кэнсиэринэн саҕалаата. Биир дойдулаахпыт, түөрт оҕо амарах аҕата Вадим Гаврильевич Пахомовка эмтэнэригэр көмөлөһөр сыаллаах «Күн киһитэ көмүскэс — Айыы киһитэ аһыныгас» диэн ааттаах нэһилиэк көмө кэнсиэрэ үгүс киһини түмтэ.
Кэнсиэри чороонноох эҕэрдэ үҥкүүнэн оскуола үөрэнээччилэрэ астылар. Тэрээһини сынньалаҥ киин методиһа Владимир Игнатьев иилээн-салайан ыытта. Амма Наахара нэһилиэгин баһылыга Захар Александров киирии тылын бар дьонугар тириэртэ. Бу киэһэ нарын ырыаларын Елена Кузьмина, Алгыстаана Михайлова, Владимир Игнатьев бэлэхтээтилэр. Көрдөөх-нардаах Любовь Никифорова, Данил Макаров, Людмила Александрова сценкаларга оонньоотулар, «Ситим», «Чэмэлиинэ» үҥкүү бөлөхтөрө «Веердаах», «Хатыҥ», «Бастыҥа», «Былааттаах» үҥкүүлэри толордулар. Мария Заборовская, Сахаяна Михайлова «Тувинскай үҥкүүнү» бэрт сэргэхтик үҥкүүлээтилэр. Бу киэһэ нэһилиэк ырыа куттаах бастыҥ ансаамбыллара «Чэлгийээнэ», «Сиибиктэ», эдэр учуутал кыргыттар бастыҥ ырыалары бэлэхтээтилэр. Айар талааннаах Марина Пахомова хоһоон ааҕан доргутта, ытыс тыаһыгар доҕуһуоллатан эбии бэйэтэ айбыт «Өнньүөспэр» хоһоонун бэлэх уунна. Кэнсиэр бэрт сэргэхтик ааста. Кэнсиэр кэннэ нэһилиэк дьонун-сэргэтин күүһүнэн лоторея оонньонно. Манна амарах санаалаахтар бэйэ бородууксуйатын, айылҕа бэлэҕин, бэйэ оҥоһугун туттаран кыттыстылар. Лотереяҕа харчынан сэртипикээттэр оонньоннулар. Бар дьоммут олох олоруу иһин охсуһар күүстээх санаалаах эдэркээн уолбутугар Вадим Пахомовка ис сүрэхтэриттэн көмөлөстүлэр. Вадим Гаврильевич муус устар ыйтан эмтэнэр. Томскай куоракка операцияламмыта. Диагноһа: «Злокачественное новообразование почки, рак левой почки». Билигин Соҕуруу Кореяҕа эмтэнэ сылдьар. Амма улууһун олохтоохторун, Сахабыт сирин сайаҕас санаалаах дьонун-сэргэтин эдэркээн аҕаҕа Пахомов Вадим Гаврильевичка өссө салҕыы эмтэнэригэр көмөлөһүөҕүн! — диэн эрэнэ ыҥырабын.
Сахалыы сайаҕас санаалаах Күн киһитэ: 40817810376000858498 Сбербанк счётка эбэтэр 79841067555 моб.бааҥҥа
Пахомова Алёна Александровна аатыгар көмө оҥорон күүс-көмө буол!
Ирина КОРЯКИНА-ОЛЕСОВА