Амма Наахара нэһилиэгэр Айыыһыт сылынан Саҥа сылбыт үктэммитэ төрдүс күнүгэр «Түмэн» сынньалаҥ киинигэр «Үрдэл-2022», «Үрдэл-2023» сылларга бастыҥ ырыалар кэккэлэригэр киирбит ырыа кэһиилээх «АЙЫЛЛААН ААРТЫКТАРА» бөлөх кэнсиэрэ буолан ааста.
Мэҥэ Хаҥалас улууһун Хара нэһилиэгин култууратын киинин иһинэн «Айыллаан аартыктара» бөлөх 2021 сылтан тэриллэн таһаарыылаахтык үлэлиир.
Кэнсиэргэ Саха өрөспүүбүлүкэтин култууратын туйгуна, Сүрүн Аартык Татьяна Степанова, Айар Аартык Николай Васильев — Айтамыл, Аламай Аартык Мария Романова уонна Саха өрөспүүбүлүкэтин култууратын туйгуна, эстрада чаҕылхай сулуһа, Алгыс Аартык Виталий Очиров кыттыыны ыллылар. Дьон — сэргэ сүргэтин көтөҕөр, ис эйгэни кэҥэтэр үтүө кэнсиэргэ үгүс киһи түмүстэ. Олохтоохтор истиҥ сахалыы ырыалары сэргии, дуоһуйа иһиттилэр. Виталий Очиров арчылаах алгыстара, Аар Айыыларга сүгүрүйүүтэ, ону тэҥэ кэнсиэргэ кэлбит ыаллары, кэргэннии пааралары тапталга анаабыт ырыатыгар, сценаҕа таһааран намыын вальска үҥкүүлэппитэ сонуннук көһүннэ. Кэнсиэргэ биир дойдулаахпыт, Өнньүөс аатын ааттатар ыччаппыт, биллиилээх аранжировщик- музыкант Алексей Абрамов чочуйан оҥорбут ырыаларын Виталий Очиров махтанан, киэн тутта толорбута олохтоохторго бэлэх буолла. Бу киэһэ Николай Васильев — Айтамыл биир дойдулаахпыт Дмитрий Максимов суруйбут хоһоонугар, ырыа айар аҕата Петр Васильев айан хаалларбыт матыыбыгар «Кырдьары билимэ!» ырыанан дьон кутун тутта. Ырыаһыт кыргыттар урукку ырыалары күүстээх ытыс тыаһын дорҕоонугар толордулар. Элбэх ырыалар кэннэ олохтоохтор Виталий Очировтан «Лээгим миэнэ» ырыаны хайаан да толорон ааһарыгар көрдөстүлэр.
Үрдүк таһымнаах Айар кэнсиэр көрөөччүлэри ырыа долгунунан ыраах сирдэри кэриттэ, айылҕаҕа тапталы, саха норуотугар махталы, бэйэ бэйэҕэ сылаас истиҥ сыһыаны үөскэтэн ааста. «Айыллаан Аартыктара» бөлөххө Айар суолгун өссө киэҥник арыллан, ылбаҕай ырыаҕыт ыраахха дуорайа, бар дьоҥҥут тапталын ыла турдун! — диэн алгыспытын эһиэхэ туһаайдахпыт буолуохтун!
Ирина Корякина-Олесова.