Үөрэҕи таһынан оҕо талаанын, дьоҕурун арыйар дьарыктар Амма улууһун бары оскуолаларыгар сыллата элбээн иһэллэр. Аныгы олох хаамыытыгар олорсон матырыйаал, ньыма көрүҥнэрэ эмиэ хаҥаан киһини сөхтөрөллөр. “Эчи, аныгы оҕолор тугу-тугу сатаабатахтара баарай?” диэн саҥа аллайарбыт эрэ хаалар.
Улуус үөрэҕин тэрилтэлэрин иитиллээччилэрин айар быыстапкалара О.П.Иванова – Сидоркевич аатынан Амматааҕы айар-сайдыы киинигэр турар буолбуттара үгэскэ кубулуйда. Быйылгы быыстапкаҕа 24 хайысханан 70 оҕоттон 89 үлэ киирдэ. Тэрийээччилэр бэлиэтииллэринэн, ордук элбэх оҥоһук Амма 2№-дээх оскуолатыттан кэллэ. Оҥоһуктары хайысхаларынан арахсан дьүүллүүр сүбэ сыаналыыр. Түмүк ыам ыйын 20 күнүгэр тахсара күүтүллэр.
Быйыл быыстапкаҕа сахаларга төрүкүттэн туттуллар оҕуруоттан, туостан, түүттэн, туойтан, оҥоһуктары, кыбытык тигиини сэргэ аныгылыы хатар пластилинтан, фетртан, эпоскиднай сымалаттан үлэлэр турбуттар. Урукку сылларга тэҥнээтэххэ таҥаска, маска уруһуйдууру элбэх оҕо баһылаабыт. Оскуола үөрэнээччилэрэ иистэнэллэрин, баайалларын, мастан, муостан уһаналларын таһынан алтантан, тимиртэн таптайыыны, сиэл хатары кытта баһылаабыттара сөхтөрөр. Арай, тэрийээччилэр бэлиэтии көрбүттэринэн, быйыл тирииттэн оҥоһук диэн суох эбит.
-Хас биирдии оскуолаҕа үөрэнээччи талаанын арыйарга дьулуһар, ону өйүүр, саҥа сүүрээннэри киллэрэн үлэлиир учууталлар аҕыйаҕа суохтар. Кинилэр сыраларын түмүгүн бу быыстапкаҕа, иитиллээччилэрин үлэлэрин нөҥүө көрөбүт,— диэн методист Александра Егорова этэр.
Онон, баҕалаах дьон оҕолор оҥоһуктарын кэлэн көрөн сэргииргитигэр ыҥырабыт.
«Амма олоҕо» хаһыат.