Айыына Мартынова «Профессионаллар-2025» өрөспүүбүлүкэтээҕи чөмпүйэнээт призера

О.П.Иванова – Сидоркевич аатынан Амматааҕы айар сайдыы киин Соморсуннааҕы филиалын “Утахчаан” куруһуогун иитиллээччитэ, Соморсун орто оскуолатын 10 кылааһын үөрэнээччитэ Айыына Мартынова «Профессионалы-2025» өрөспүүбүлүкэтээҕи чөмпүйэнээккэ «Кылтан, сиэлтэн хатыы» хайысхатыгар үһүс бочуоттаах миэстэни ылла. Күрэхтэһии Дьокуускай куоракка политехническай оскуолаҕа буолла.


Манна өссө «Уһанар дьыала», «Туойунан оҥоһук», «Чороону оҥоруу» хайысхалара ыытылыннылар. Манна даҕатан эттэххэ, биһиги улууспут оҕолоро элбэх көрүҥҥэ ситиһиилээхтик кытта сылдьаллар, улууспут чиэһин көмүскүүллэр. Хайысханан күрэхтэһиилэр олунньу ый устата буолуохтара. Оттон кыл, сиэл хайысхатыгар элбэх кыттааччылаах тыҥааһыннаах күрэхтэһии «Кыайыы 80 сылыгар» диэн сөрүө ньыматынан панно оҥорон таһаарыытыгар буолла (сиэли таҥастааһын, ситии хатыы, панно өрүү).

Күрэскэ оҕолор олус бэлэмнэнэн кэлбиттэрин уопсай бааллара тэҥнэспиттэрэ, кыранан араастаспыттара туоһулаата. Түмүккэ Айыына үһүс миэстэни ылары ситистэ. Быйылгы чөмпүйэнээккэ 12 оҕо кыттыбыта өбүгэ төрүт дьарыга инникилээх буоларын көрдөрдө.

Айыына өрөспүүбүлүкэтээҕи күрэхтэһиигэ иккис сылын кыттар, «Утахчаан» куруһуокка сөбүлээн дьарыктанар. Сыл ахсын быыстапкаларга, предметнэй олимпиадаларга ситиһиилээхтик кыттар. Чөмпүйэнээт улуустааҕы уонна өрөспүүбүлүкэтээҕи түһүмэхтэргэ утумнаахтык дьарыктанан, туруорбут сыалбытын ситистибит.
Эһиилги сылга «Профессионаллар» күрэхтэһии «Кыл, сиэл искусствота» хайысхаҕа ыытыллыбыта үбүлүөйдээх 10 сыла буолар. Онон кылынан, сиэлинэн дьарыктанар оҕолору күүскэ бэлэмнэнэн кыттаргытыгар ыҥырабыт!

Сардана Борохина,

«Утахчаан» куруһуок салайааччыта, эбии үөрэхтээһин уһуйааччыта

Читайте дальше