Н.Е.Иванов аатынан Бөтүҥ орто агро оскуолатыгар илин эҥэр оскуолаларын “Эдэр учууталлар” диэн профессиональнай күрэхтэригэр 19 кыттааччы кэлэн бэйэлэрин тургута сылдьаллар. Быйылгы күрэх Улуу Кыайыы 80 сылыгар ананар.
«Биһиги оскуолабыт, нэһилиэкпит, улууспут быйылгы күрэҕи Амма сиригэр-уотугар ыытарбытыттан олус үөрэбит. Бу күрэх 2006-2007 сс. общественно-государственнай күрэх быһыытынан саҕаламмыта. Билигин номнуо үгэс буолан кыайыылаах учуутал үлэлиир оскуолатыгар, улуустан улууска көһө сылдьар, Илин эҥэр үөрэҕин систиэмэтин сайыннарыыга улахан төһүү күүс буолбутун бэлиэтиибит. 2006 с. өрөспүүбүлүкэ үөрэҕин министиэристибэтин кадровай бэлиитикэҕэ отделын көҕүлээһининэн эдэр учууталларга анаан кэтэхтэн өрөспүүбүлүкэтээҕи күрэх тэрийбиппит. Салайааччы Карамзина Надежда Шиндикиевна этэ. Ол кэмҥэ мин үөрэх министиэристибэтигэр эдэр исписэлиис этим. Онон эдэр учууталлары кытта үлэлэһэр этим. Онтон 2007 с. Барахсанова Таисия салайааччылаах Чурапчы эдэр учууталларын түмсүүтүн көҕүлээһининэн Андрей Мартынов салайааччылаах өрөспүүбүлүкэ эдэр учуонайдарын түмсүүлэрин өйөөһүнүнэн илин эҥэр улуустарга анаан күрэх буолбута. Хас биирдии улуустан общественнай экспертар кыттыыны ылбыттара. Билигин бу күрэх үөрэҕи сайыннарар уонна квалификацияны үрдэтинэр институт былааныгар киирэн биир ураты тэрээһин буолар. Кылгастык сорох сыллары санаан аастахпына2007 сыллаахха Чурапчыга кыайыылаах аатын Батюшкин Прокопий, Томпо улууһун Тёплый ключ оскуолатын история учуутала ылбыта. Кини кэлин 2017 с. өрөспүүбүлүкэҕэ «Учитель года» күрэх кыайыылааҕа буолбута. Билигин Дьокуускай 33 нүөмэрдээх оскуолатын дириэктэрэ. Онтон 2008 сыллаахха Томпоҕо Шадрин Семён Семенович, Амма улууһун Чакыр оскуолатын история учуутала кыайыылаах тахсыбыта. Кэлин уопутуран биир эдэр дириэктэр буола үүнэн, билигин Амма улууһун үөрэҕин управлениетыгар методическай отдел салайааччыта. 2009 сыллаахха Чакырга Стручков Василий, Мэҥэ-Хаҥалас улууһун Төхтүр оскуолатын саха тылын уонна литературатын учуутала кыайыылаах буолбута. Аммаҕа буолбут күрэҕи Социалистическай Үлэ Геройа Л. В. Киренскай 100 сааһыгар анаан тэрийбиттэрэ. 2012 сыллаахха Томпо улууһун Мэҥэ-Алдаҥҥа Ларионов Николай Александрович, Амма улууһун В. Г. Короленко аатынан 1 нүөмэрдээх Амма орто оскуолатын ОБЖ учуутала кыайбыта. Николай Александрович хас да сыл дириэктэрдээн, билигин улууспут Үөрэҕин управлениетын салайааччыта. Бу аҕыйах сыллары холобур аҕалбытым тугу көрдөрөрүй? Күрэх формата эдэр учууталлар опыт ылалларын таһынан бэйэлэрин ис кыахтарын арыйарга көмөлөһөн салайааччылар буолан тахсарга, кадрдары бэлэмнииргэ төһүү күүс буолар эбит диэн сыаналыыбын.
Түгэнинэн туһанан махтал тылларын наставникпар Карамзина Надежда Шиндикиевнаҕа, өр сылларга күрэх тэрээһинин өйөөбүт СР министерствотын кадры кытта үлэҕэ сүрүннүүр специалист Родионова Августина Михайловнаҕа, быйылгы күрэҕи иилээн саҕалаан ыытарга күүс-көмө буолбуттарыгар Амма улууһун дьаһалтатыгар, үөрэх управлениетыгар начальник Ларионов Николай Александровичка, солбуйааччыта Иванова Татьяна Ивановнаҕа, методическай отдел салайааччытыгар Шадрин Семен Семёновичка махталбын этэбин. Быйылгы күрэх тоҕо Бөтүҥҥэ буолла диир буоллахха, былырыын Чурапчыга буолбут күрэххэ биһиги оскуолабыт историяҕа учуутала Никифоров Егор Трофимович кыайыылаах буолан турар. Күрэхпит Улуу Кыайыы 80 сылыгар ананар»,- диэн Н.Е.Иванов аатынан Бөтүҥ орто агро оскуолатын дириэктэрэ Акулина Иванова санаатын үллэһиннэ.
«Амма олоҕо» хаһыат