Сунтаартан төрүттээх Амма нэһилиэгин олохтооҕо, өр сылларга Амма 1 нүөмэрдээх орто оскуолатыгар саха төрүт култууратын учууталынан үлэлээбит бэтэрээн учуутал Александра Ивановна Артемьева Арассыыйа дьоруойа буолбут Филипп Евсеев биир дойдулааҕынан киэн туттар. Кини төрөөбүт дойдутугар, Сунтаар улууһугар Өрөгөй күнэ тосхойбутун истээт ис сүрэҕиттэн үөрэр. Үтүө түгэни мүччү туппакка Филипп Евсеев үрдүк наҕараадатынан итии-истиҥ тылларынан санаатын үллэстэригэр көрдөстүбүт.
«Биир дойдулаахпыт Филипп Евсеев Арассыыйа дьоруойа буолбутун истэн үөрэн, долгуйан олоробун. Хорсун быһыыны көрдөрөн, саха норуотун аатын үрдүктүк ааттатта. Аҕа дойду уоттаах сэриитигэр хорсуннук охсуспут эһэлэрбит суолларын суоллаата. Филипп эһэтэ Курскай тоҕойго кыргыспыт сиригэр Дьоруой сулуһун туппута ордук долгутуулаах буолла. Саха сэмэй уолаттара, буойуннара, ханна да тиийдэллэр, сатабылларын, тулуурдарын, дьулуурдарын, хорсуннарын көрдөрө сылдьалларынан киэн туттабыт. Филипп тус олоҕор барыта этэҥҥэ буоллун, кыайыы көтөллөөх төрөөбүт дойдутугар эргилиннин диэн алгыстаах тылбытын аныыбыт. Эйэлээх олохпут эргийдин, туруктаах олохпут туругурдун», — диэн Александра Ивановна санаатын тириэртэ.
Александра Артемьева “Үөрүү үктэллээх, кыайыы көтөллөөх”
