Психолог-консультант, эти-сиини чэбдигирдиигэ үлэлэһэр Александра Ушницкая уонна уҥуох-сүһүөх гимнастикатыгар уопуттаах тренер Валерий Готовцев өрөспүүбүлүкэ араас улуустарыттан дьону тумэн Амма Чакырыгар кэлэн сайыҥҥы сынньаланы сылын аайы тэрийэллэр.
Биэс хонук устата буолар сезоҥҥа уҥуох-сүһүөх ыарыытыгар маастар-кылаастар, эрчиллиилэр буолаллар, ону кытта өйү-санааны сааһылааһыҥҥа психологическай трениннэр ыытыллаллар.
“Биһиги Чакырга Прокопьевтар дьиэ кэргэн турбазаларыгар чэбдигирдии лааҕырын үлэлэпиппит быйыл онус сыла буола охсубут. Олус үчүгэй усулуобуйаҕа олоробут. Аһылык барыта бэлэм. Дьиҥ бэйэ бородууксуйатынан күҥҥэ түөртэ аһыыбыт. Биир сезон биэс хонук устата толору буолар. Алтыс күммүтүгэр тарҕаһан, атын сезон саҕаланар. Быйыл лааҕырбыт уратыта диэн катамаранынан устууну, Олоҥхо ыһыаҕа буолан ааспыт олус кэрэ оҥоһуулаах пааркаҕа экскурсияны эбии киллэрдибит. Аны Аммаҕа үчүгэй баҕай “Амма-Олимп” стадиоҥҥа уопсастыбаннай тренер, уҥуох-сүһүөх гимнастиктын инструктора Валерий Готовцев маастар кылаас ыытта. Киһи бэйэтин доруобуйатын бэйэтэ көрүнэн, күннэтэ хамсаныылары оҥоро сырыттаҕына, чөл туруктаах, куруутун чэбдик сылдьар. Ону биһиги тренербинээн Валерий Ивановичтыын бу хас да сылларга бэйэбит холобурбутунан көрдөрдүбүт уонна билиһиннэрэ да сылдьабыт”, — диэн Александра Егоровна сырдатар.
Стадиоҥҥа ыытыллыбыт сэрээккэҕэ лааҕырга сынньана сылдьааччылар уонна Амматтан ким баҕалаах кэлэн буор босхо ыытыллыбыт маастар кылааска кытыннылар, сүһүөхтэригэр, уҥуохтарыгар наадалаах эрчилиилэри көрдүлэр, элбэҕи биллилэр.
“Мин бэйэм Чакырга үлэлиир лааҕырга урут сылдьыбытым. Үчүгэй баҕайы этэ. Ол кэнниттэн быдан доруобуйабын көрүнэн дьарыктанабын. Александра Егоровна ыытар онлайн сарсыардааҥҥы эрчиллиилэрин оҥорор этим. Бу буолбут эрчиллиигэ Валерий Иванович Готовцев маастар кылааһыгар бастакытын сырыттым. Астынным. Киһи төбөтүттэн саҕалаан атаҕар тиийэ уһуктар, сүһүөххэр туһалаах хамсаныылары оҥордубут. Маастар-кылааска сылдьыбыт аммалар бэйэбит бөлөх тэриннибит уонна дьарыктаныах буоллубут. Валерий Ивановичтаах өссө от ыйын 11 күнүгэр эмиэ кэлэн маастар-кылаас ыытыахтаахтар. Бүгүн бэйэбит эмиэ стадиоҥҥа кэлэн хамсаныыларбытын хатылыахпыт”, — диэн Чапчылҕан олохтооҕо Раиса Захарова санаатын үллэһиннэ.
“Амма олоҕо” хаһыат