Бэйэни булунууга, үс куту бөҕөргөтөргө, тус туругу тупсарарга, социальнай сыһыанын сылытарга сыаллаах-соруктаах «Алмаас» реабилитационнай кииҥҥэ эр дьон олорор. Онон ордук патриотическай бырааһынньыктары убаастыыллар. Аймах-билэ дьоно сэрии аһыы амтанын билбиттэрин ахталлар, саныыллар. Ким эрэ аҕата сэрииһит, ийэтэ тыылга үлэ бары кыһалҕатын билбит, чугас аймаҕа сэрии толоонугар охтубут…. Кэнники сылларга Амма улууһун Бөтүҥүттэн киирэн биир дойдулаахтарын бырааһынньыгынан эҕэрдэлииллэрэ, шефтэһэллэрэ үтүө үгэскэ кубулуйда.
Ол курдук Кыайыы 77 сылыгар Николай Борисов, Александра Давыдова салайыыларынан «Бөтүҥ Түмсүү» кэлэн бэркэ эҕэрдэлээн, оонньотон, викторина ыытан сэргэхсиппиттэрэ. Бу кииҥҥэ баар биир дойдулаахтарын кытта алтыспыттара, күүс-көмө буолбуттара. Онтон Кыайыы 78 сылыгар Аҕа дойду сэриитин сылын оҕолоро Руслан Денисович Алексеев, Анатолий Дмитриевич Афанасьев сэрии кэмигэр муор-туор олохтоммуттарын, аччыктааһын кыһалҕатын билбиттэрин сиһилии сэһэргээн элбэх ыйытыыларга хоруйдаан алтыһыыттан дуоһуйууну ылбыттара. Билигин Руслан Денисович Аҕа дойду сэрии кыттыылааҕын, аҕата Денис Егорович Алексеев аатын үйэтитэр сыаллаах кинигэ суруйа сылдьар. Дьэ онтон быйыл, Улуу Кыайыы 79 сылынан Василена Табунанова салайыытынан «Бөтүҥ Түмсүү» сэрии сылын оҕолорун Александра Ивановна Заболоцкаяны, Руслан Денисович Алексеевы, Анатолий Дмитриевич Афанасьевы, Анна Архиповна Филатованы, кинилэр дьиэ кэргэннэрин үтүө үгэс быһыытынан эҕэрдэлээтилэр. Быйылгы Кыайыы күнэ түһүлгэтэ кэҥээбитэ кэрэхсэннэ. Ол курдук «Алгыстаах АммА» диэн айар айылгылаах бөлөх кэрэ кэнсиэрин Улуу Кыайыыга уонна Амма улууһугар ыытыллыахтаах Олоҥхо Ыһыаҕар анаан туран «Алмаас» реабилитационнай кииҥҥэ аралдьытыы култуурунай тэрээһини ыытта. Ол туһунан кэнсиэри иилиир-саҕалыыр конференсье Мария Старостина аан тылы арыйыытыгар бэлиэтээтэ, далбардар дьоһун үлэлэрин, олоххо ситиһиилэрин аҕынна. Бу күн Кыайыы кынаттаах кэнсиэр «Алмаас» реабилитационнай кииҥҥэ олус сэргэхтик ааста, ырыа-тойук эгэлгэтэ, ылбаҕайа ылланна. Амма улууһун бочуоттаах олохтооҕо Тамара Литвинцева бэйэтэ суруйбут хоһоонун нууччалыы-сахалыы ааҕан араас омук дьонун долгутта. Ырыа куттаах Татьяна Бандерова бэйэтэ туһунан суоллаах-иистээх мелодист баянын тардан, киин олохтоохторо тыыннаах муусуканы истэн эттиин-хаанныын уулла үөрдүлэр. Татьяна балтытынаан Людмила Васильевна Николаевалыын байыаннай ырыалары ыллаан эйээртилэр. Онтон Чакыртан төрүттээх, сцена бэтэрээнэ Надежда Алексеева, нууччалыы-сахалыы ырыалары өрө көтүтэн кэбистэ. Ыллаһа олорор көрөөччүлэр ойон туран, үҥкүү үөһүгэр түстүлэр. Бу курдук бэртээхэй кэнсиэри көрөн кырдьык да ааспыт үйэ саллааттарын курдук Кыайыыга кыттыһан үөрэн-көтөн мичилийдилэр. «Алгыстаах АммА» бөлөх салайааччыта Ульяна Иванова, ийэтинээн, «Гражданскай килбиэн» бэлиэтин хаһаайката, сцена бэтэрээнэ, СӨ үөрэҕириитин туйгуна Мария Евсеевна Никандровалыын кыттыыны ылбыттара олус кэрэхсэннэ. Маны таһынан «Алгыстаах АммА» бөлөх өттүк харалаах, ас-үөл кэһиилээх кэлэн үөртүлэр. Биир дойдулаахтарын көрсөн уопсай өйдөбүнньүк хаартыскаҕа түстүлэр.
«Алмаас» киин олохтоохторо моральнай уонна материальнай көмөлөрүүн иһин салайан илдьэ кэлбит Людмила Николаеваҕа махталларын тириэртилэр. Социальнай кыһалҕалаах, олоҕор моһоллорго түбэспит, аһыы утахха ыллаттарбыт, көҥүллэрэ быһылла сылдьыбыт, уустук дьылҕалаах дьону өрө тардыы көлөһүннээх, көстүбэт үлэ буолар. Ол да буоллар иннибит диэки, сүүрүгү өксөйө дьулуһабыт. Кэнники сылларга Сахабыт сиригэр общественнай хамсааһын үлэлэрэ таһымнаахтык ыытыллар буоллулар. Ордук «АммА Түмсүү» (сал.Алексанлр Кузьмин А.Н.-Хомпу Таман) ситиһиилээхтик үлэлиирин бэлиэтиибит. Бу хамсааһын иһинэн таҥыллыбыт «Алгыстаах АммА» ыллыыр бөлөх тэрээһиннэри өрүү да киэргэтэр. Бу түмсүү биир кыахтаах утаҕа-салаата өрүһүйэр өбүгэлээх «Бөтүҥ Түмсүү» буолар. «Алмаас» киини кытта ыкса психосоциальнай хайысханан ыкса үлэлэһэ олорор түмсүү биир дойдулаахтарыгар Бөтүҥ нэһилиэгин (баһ. Никитин А.Н.) көмөтүн ситимниир соруктаах үлэлиир. Бу күн хас биирдиибит куппутугар “Эйэ, дьол иhин» диэн норуот уһуттан түспэт ырыата дьиэрэйдэ.
Суох буоллун сэрии,
Суох буоллун өлүү!
Туругур, эйэ!
Эйэ! Эйэ!
Тамара ЕГОРОВА, психолог-реабилитолог