Төһө даҕаны Алтан — Амма улууһун биир кырыы нэһилиэгэ буоллар, сайдыы манна кимиилээхтик хардыылыыр. Аҥардас бу кэмҥэ үс улахан федеральнай бырайыак олоххо киирээри турар. Дойду президенин быһаччы өйөбүлүнэн олохтоохтор ыраас уу кэлэр скважинатын туһаныахтара, «Тыа сирин кэлимник сайыннарыы» бырагырааманан кулууп тутуллар, эмиэ бу бырагырааманан быйыл нэһилиэккэ киириигэ улахан бэлиэ туруо. Онон олох оргуйар киинигэр олорор алтаннар Саха өрөспүүбүлүкэтин бырабыыталыстыбата 2023 сыл түмүгүнэн отчуоттуур мунньаҕар көхтөөхтүк кытыннылар. Үөрэх уонна наука миниистирэ Нюргуна Соколова салайар мунньаҕар сүүсчэкэ киһи кэлэн санааларын эттилэр, үлэни сыаналаатылар.
Этиллибитин курдук, Амма улууһугар соҕотох Алтан нэһилиэгэр үс улахан федеральнай бырайыактар тутулла туралларынан боппуруостар сүнньүнэн бу тутуулар тула буоллулар. Маны сэргэ, нэһилиэнньэни сүрүн долгутар боппуруостарынан оҕо уһуйаанын саҥа дьиэтин тутуута, «Уу сүүрдэр» кыбаарталга хочуолунай, 35 Квт үрдүк күүрүүлээх уот линията, сытар балыыһа, саҥа быраас, эдэр исписсэлиистэргэ саҥа уопсай дьиэ уо д.а. буоллулар. Оҕо уһуйаанын саҥа дьиэтин туруорсан эдэр көлүөнэ төрөппүттэри таһынан аҕам саастаах дьоммут эмиэ долгуйалларын иһитиннэрдилэр. Ол курдук, бочуоттаах сынньалаҥҥа олорор Ольга Никифорова уһуйаан эргэ дьиэтигэр бэйэтиттэн саҕалаан оҕолоро, сиэннэрэ, хос сиэннэрэ, дьиэ-кэргэттэригэр дэбигис төрдүс көлүөнэ оҕолоро сылдьарын аҕынна, саҥа уораҕайга үп көрөллөрүгэр көрдөстө.
Алтаннары нэһилиэк иһинээҕи кыһалҕалар эрэ буолбакка, бүтүн өрөспүүбүлүкэ үрдүнэн турар боппуруостар эмиэ долгуталлар. Ол курдук, энергетикэ бэтэрээнэ Павел Неустроев сыллата туруорсар үрдүк күүрүүлээх уот линиятын таһынан Өлүөнэ муостатын тутуутун токкоолосто, сир аннынан барара табыгастааҕын бэлиэтээтэ.
Этиилэргэ киирдэххэ, уопсастыбаннас аатыттан биэнсийэлээхтэр түмсүүлэрин бэрэссэдээтэлэ Марина Лыткина судаарыстыба кыаммат араҥаҕа элбэх көмөнү оҥоро олорорун тоһоҕолоон эттэ, иккилии сыл буола-буола бырайыас төлөнөрүн туһанан сынньана барарга судаарыстыба салалтата кыах биэрэригэр махталын биллэрдэ. «Урукку сыллары кытта тэҥнээн көрдөхпүнэ таһыччы сайдыылаах, сынньалаҥ олох кэллэ. Аҥардас биһиги алтаммытыгр төһөлөөх тутуу барарын көрөммүн астынабын»,- диэн салалтаҕа махтанна.
Отчуот үөрүүлээх чааһынан наҕараалалары туттарыы буолла. Ол курдук, Алтаннааҕы олох-дьаһах хаһаайыстыбатын үлэһитэ Герасим Ильин СӨ Ил Дарханын солотуллубут бэлиэлээх махталын, орто оскуола алын сүһүөҕүн учуутала Мария Неустроева Үөрэх уонна наука министиэристибэтин бочуотунай кыраамататын үөрүүлээх быһыыга-майгыга туттулар.
Түмүккэ СӨ бырабыыталыстыбатын 2023 сыл түмүгүнэн үлэтин-хамнаһын нэһилиэнньэ биһириирин биллэрдэ.
«Амма олоҕо» хаһыат.