Улуус кииниттэн тэйиччи сытар Алтан нэһилиэгэр бу сылы түмүктүү икки улахан эбийиэк үлэҕэ киириэҕэ. Эбийиэктэр иккиэн федеральнай бырагыраамалар чэрчилэринэн тутулла сылдьаллар.
“Биһиги нэһилиэкпитигэр икки улахан эбийиэк киирээри күүрээннэх үлэлэр ыытылла тураллар. Уопсайа 300 мөл солкуобайдаах тутуу үлэлэрэ ыытылла тураллар. Бу кыра нэһилиэккэ сүдү хамсааһын буолар. Ол курдук бастатан туран “Ыраас уу” национальнай бырайыак чэрчитинэн ууну ыраастыыр станция тутуллан бастакы түһүмэҕэ түмүктэнэн эрэр. Бу үлэни “Вариант+” диэн тэрилтэ тута сылдьар. Бу күннэргэ түмүктүүр үлэлэр, бэрэбиэркэлэр бара тураллар. Станция тутуута барыта түмүктэннэҕинэ, үлэлээн бардаҕына, олохтоохтор дьиэлэригэр ыраас уу тиийэн кэлэр кыахтанар. Манна билигин нэһилиэк баһылыга Николай Николаевич Карамзин иһитиннэрбитинэн 4 биригээдэ үлэлии сылдьар.
Онтон биир биригээдэ биһиги бэйэбит олохтоох уолаттарбыт буолаллар. Хочуолунайга киирэр трассаҕа сылытыы үлэтин ыыта сылдьаллар. Ууну ыраастыыр станцияны сэргэ эмиэ федеральнай “Тыа сирин кэлимник сайыннарыы” бырагырааманан култуурабыт киинэ тутуллан түмүктэнэн эрэр. Бу улахан тутууну кэтэспиппит ыраатта. Баһылык бэлиэтээбитинэн бу сыл түмүктэниэр диэри үлэҕэ киириэхтээх. Дизайныгар кыра боппуруостар бааллар. Онон барыта этэҥҥэ буоллаҕына, Саҥа дьылбытын да көрсүөхпүтүн сөп. Билигин манна 30-ча киһи үлэлии сылдьар. Сылааһа сэтинньи 4 күнүгэр киирбитэ.
Манна даҕатан эттэххэ, тыраахтырынан цеменнээһин үлэтигэр бэйэбит биир дойдулаахпыт, олохтоох, 70-тан тахсыбыт Егор Ильин ылсан үлэлии сылдьар. Быйыл кулууппут тэриллибитэ 50 сыла. Үбүлүөйдэрин ахсынньы 6-7 күннэригэр бэлиэтээри өрө көтөҕүллэн бэлэмнэнэ сылдьаллар. Онон бэйэтин үбүлүөйүгэр саҥа уораҕайданара туспа үөрүү. Бу тутуу нэһилиэкпитигэр иккис таас тутуу буолар. Бу курдук Алтаммыт нэһилиэгэ үүнэр-сайдар. Хайа баҕарар олоруохха, үлэлиэххэ табыгастаах. Күн бүгүн нэһилиэк улахан аҥара киин ититэр ситимҥэ холбонон олорор. Баһылыкпыт эппитинэн, кэлэр сылга өссө газ кэлэр күүтүллэр”, — диэн нэһилиэк уопсастыбанньыга Наталья Борисова сонунун үллэстэр.
“Амма олоҕо” хаһыат