СӨ үөрэхтээһинин туйгуна, Учууталлар учууталлара, Е.С. Никитина аатынан Алтан орто оскуолатын саха тылын уонна литературатын бэтэрээн учуутала Раиса Никифорова «Олоххо таптал» диэн бэртээхэй хоһооннорун хомуурунньуга бу күннэргэ күн сирин көрбүтэ. Саҥа айымньылар кинигэлэрин Алтан орто оскуолатыгар бэрт интэриэһинэйдик сүрэхтээтилэр.
“Олоххо таптал” диэн хоһоон хомуруунньуга бу Раиса Исаковна бочуоттаах сынньалаҥҥа тахсан баран таһаарбыт иккис хомуурунньуга буолар. Бастакыта «Айыы сирэ — Амма» диэн 2021 с сүрэхтэммитэ. Онтон бу иккис кинигэтэ тахсыбытын бэлиэтиир үөрүүлээх тэрээһин күрэх быһыытынан, бэрт интэриэһинэйдик барда. Ол курдук саха тылын үйэтитэр, уус-уран ааҕыыны сайыннарар, кылааһынан түмсүүлээх буолууну, сомоҕолоһууну үөскэтэр, кэрэни кэрэхсэтэр сыаллаах- соруктаах кылаас кэлэктииптэрин икки ардыларыгар хомуруунньукка киирбит хоһооннору уус ураннык ааҕыыга уонна ырытыыга бэртээхэй күрэх буолан ааста . Күрэҕи саха тылын уонна литературатын учуутала Акулина Неустроева иилээн-саҕалаан ыытта. Дьүүллүүр сүбэҕэ ааптар Раиса Никифорова, дириэктэр иитэр үлэҕэ сүбэһитэ Айталина Тихонова, олохтоох бибилэтиэкэ исписэлииһэ Алена Захарова уонна оскуола бибилэтиэкэрэ Наталья Александрова киирдилэр. Күрэх икки бөлөҕүнэн ыытылынна. Бастакы бөлөххө 1-4 кылаастар, иккис бөлөххө 5-10 кылаастар күрэхтэстилэр. Күрэххэ кылаас кэлэктиибэ барыта кыттыыта, өйтөн уус ураннык ааҕыы, ырытыы, киэргэтии көрүҥэ сыаналанна. Кыттыбыт кылаас кэлэктииптэригэр туоһу сурук туттарылынна. Бастакы бөлөххе бастаабыт 3 с кылаас (Кыл салайааччы Петрова А.С.) , иккис бөлөххө бастаабыт 6 с (кыл.салайааччы Стручкова Г.И.) кылаастар кэлэктииптэригэр Раиса Исаковна бэйэтэ туруорбут харчынанан бириэмийэтин, өйдөбүнньк бэлэхтэрин туттарда.
Анал бирииһи 10-с кылаас кэлэктиибэ (салайааччы Неустроева А.Г.) ылла. Киэҥ хабааннаах күрэҕи тэрийээччи, сахатын тылын дэгиттэрдик баһылаабыт хомоҕой тыллаах уһуйааччыбытыгар Раиса Исаковнаҕа истиҥ тыллары этэн туран, оскуола дириэктэрэ Александр Шишигин Махтал суругун туттарда уонна айар аартыга арыллан сайда үүнэ турарыгар баҕарда.
Наталья АЛЕКСАНДРОВА