Үүммүт 2025 сыл Алтаннааҕы «Кэскил» уһуйааҥҥа айымньылаахтык саҕаланна. Улуус уйуһааннарын иитээччилэрэ, оскуола педагогтара «Оҕо уонна театр» диэн семинар-практикумтан бэрт элбэҕи биллилэр.
Алтан нэһилиэгэр “Кэскил” уһуйаан кырачааннары театр умсулҕаннаах эйгэтигэр уһуйар семинары биир идэлээхтэригэр тэрийэн ыытта. Ыалдьыттары уһуйаан иитиллээччилэрэ ыллаан-туойан киэргэттилэр. Семинар кыттыылаахтарыгар Д.Г. Готовцева аатынан Сатаҕайдааҕы оҕону сайыннарар киин иитээччилэрэ улуус иһинэн ыытыллар «Театр уонна оҕо» бырайыагы сырдаттылар, үлэлэрин опытын тарҕаттылар. Ыҥырыылаах ыалдьыппыт, биир дойдулаахпыт СӨ култууратын үтүөлээх үлэһитэ, Арассыыйатааҕы театр сойууһун чилиэнэ, Ю.Н. Козловскай аатынан «Синяя птица» өрөспүүбүлүкэтээҕи фестиваль дириэктэрэ Саргылана Адамова олус интэриэһинэй, туһалаах маастар-кылааһы ыытан бэйэтин үлэтин опытын сырдатта.
Маны тэҥэ «Кэскил» уһуйаан 65 сыллаах үбүлүөйүн көрсө «Үйэлэри ситимниир тиһиллибит чахчылар» фотогалерея быыстапка үөрүүлээх быһыыга-майгыга арылынна. Кыттыбыт педагогтар уонна иитээччилэр семинары сэҥээрдилэр, элбэх саҥаны билэн-көрөн тарҕастылар.
Антонида ВАСИЛЬЕВА