Саҥа дьыл – дьоҥҥо-сэргэҕэ саамай күүтүүлээх бырааһынньык. Бу бырааһынньыгы үгэс быһыытынан дьиэ-кэргэнинэн үөрэ-көтө бэлиэтииллэр, хас эмэ ый инниттэн күүтэллэр, бэлэмнэнэллэр. Онтон, кырдьар сааска соҕотох хаалбыт, кырдьаҕастар дьиэлэригэр олорор дьоҥҥо бу бэлиэ күн төһө күүтүүлээҕэ буолуой?
Дьоҥҥо тарҕаммыт өйдөбүлүнэн интэринээт-дьиэ – бу бэйэтэ дьоҕус уопсастыба буолар. Онно эмиэ тус-туспа дьылҕалаах биһиги уонна эһиги курдук дьон олороллор. Саҥа дьыл күүтүүлээх күнүн бары арааһынайдык көрсөбүт. Ол курдук, ким эрэ хампаанньа «тэбэр сүрэҕэ» буолан уопсай «дьуолканы» көрө барарга ыҥырыа, сарсыардааҥҥы диэри үҥкүүнү да таптааччылар, тэлэбиисэр иннигэр олорон көрсөөччүлэр, сылаас дьиэҕэ кэтэҕириин ороҥҥо сууланан сытан утуйан букунатар дьон эмиэ баар буолуохтара. Ким эрэ табыллыбатах тапталын санаан хараҕын уутунан суунуо, кэккэлэһэ олорор ыалларын эҕэрдэлии сүүрээччи да көстүө. Интэринээт дьиэҕэ бу көстүүлэр эмиэ бааллар. Бу боппуруоска эмиэ толору, эрэллээхтик эппиэттиэххэ сөп: «күүтэллэр». Эбиитин олус күүскэ. Киһи төһө да сааһырдар сөҕүмэр дьиктилэри салгыы итэҕэйэр, быычыкаайыктан да кыра оҕолуу үөрэр. Ол курдук, Татьяна Кондратьевна Ядрихинская аатын сүгэр Намнааҕы геронтологическэй кииҥҥэ саҥа дьыл бырааһынньыга бу нэдиэлэ ортото бэрт сэргэхтик, үөрүү-көтүү аргыстаах ааста. Бу кииҥҥэ олорор биир дойдулаахпытын Анастасия Титовна Чемезованы сыл түмүгүн сүпсүлгэнигэр төһө да тиийэн тус бэйэтигэр туттарбатарбыт, дьонунан бэлэх ыытан сүргэбит көтөҕүллэн, кинилиин тэҥҥэ үөрсэн олоробут.
Алтан орто оскуолатыгар бииргэ үөрэммит кылааһынньыктарыгар Елена Петровна Батюшкина (Александрова) нөҥүө тахсаммыт оҕо саастарын табаарыһыгар бэлэх оҥороннор бырааһынньыктааҕы үөрүүтүн үрдэттилэр. Алтаҥҥа олорор биир кылааска үөрэммит үөлээннээҕэ, оччолорго оскуола хомсомуолун кэмитиэтин сэкирэтээрэ Николай Алексеевич Иванов дойдутун аһыттан – сибиэһэй ынах этиттэн кэһиилээн ыытта. Олохтоох дьаһалта аатыттан эҕэрдэ суругу, сэмэй бэлэҕи кытары алаас сир минньигэс соботун ыыттыбыт. Эҕэрдэ тыллардаах, ырыалаах уонна дойдутун сонуна аргыстаах видеоролик устан, таҥан ситим нөҥүө ыытарга ыҥырыыбытын ылынан көмөлөспүт Римма Дьячковскаяҕа, эҕэрдэлэрин уонна сонуннарын тириэрдибит Фаина Новиковаҕа, Марина Лыткинаҕа, Парасковья Неустроеваҕа, Альбина Шишигинаҕа, Наталья Александроваҕа, Анисия Петроваҕа, ырыа аргыстаах Мария Удинаҕа махтал тылларын аныыбыт. Дьокуускай куоракка диэри баһыылкабытын тириэрдибит дьаһалта спортка исписсэлииһигэр Сергей Захаровка, бэлэхтэри Дьокуускайтан ыллаттаран геронтологическэй кииҥҥэ илдьэн туттарбыт Намҥа олорор үтүө санаалаах биир дойдулаахпытыгар, ис дьыала уорганын үлэһитигэр Алексей Александровка, Анастасия Титовна бииргэ үөрэммит доҕотторугар олохтоох дьаһалта аатыттан истиҥник махтанан туран үүнэн эрэр 2025 сыл үгүс үөрүүнү-көтүүнү, дьоллоох түгэннэри бэлэхтээтин, үлэҕит таһаарыылаах, үтүө санааҕыт үс бүк үрдээн үтүөнэн эргийдин диэн алгыспытын ыытабыт.
Татьяна АТЛАСОВА