Амма улууһугар күннэтэ анал байыаннай дьайыыга сылдьар биир дойдулаахтарбытыгар оҥоһуллар көмө уҕараабат. Ол барыта амарах сүрэхтээх дьон баар буолан кыаллар. Бу туһунан “Амарах сүрэх” уопсастыбаннай түмсүү салайааччыта Римма Алексеева этэр. Кини бу күннэргэ меценат, кинилэргэ куруутун наада буоллар да бэйэтин көмөтүн оҥорор турар Руслан Федотов таба этин тириэрдэн, ону ыыһаан анал байыаннай дьайыыга кытта сылдьар биир дойдулаахтарбытыгар ыытан эрэбит диэн иһитиннэрдэ.
“Билигин буола турар байыаннай дьайыыга биһиги бэйэбит уолаттарбыт, бырааттарбыт, убайдарбыт кытта сылдьаллар. Кинилэр эйэлээх олох баар буоларын туһугар ытык иэстэрин толороллор. Онон биһиги мантан кинилэргэ туох баар кыалларын оҥоро олоруохтаахпыт. Мин тус бэйэм Римма Васильевна салайар түмсүүтүгэр дириҥ махталбын тириэрдэбин. Кинилэр оҥоро сылдьар көмөлөрө кэмэ суох күндү буолар уолаттарга. Кинилэр уоппускаларыгар кэлэ сылдьан кыһалҕаларынан, көннөрү да киирэн тахсаллар уонна маннык өйөбүл дойдуларыттан кэлэрэ олус күндүтүн этэллэр. Онон община бултаан биэрбит табатын этин анал байыаннай дьайыыга сылдьар, ону сэргэ госпитальга эмтэнэ сытар уолаттарбытыгар диэн анаан ис сүрэхтэн кыайан, эргиллэн кэлэллэрин туһугар диэн тиэрдибиппит. Ону үчүгэй баҕайытык ыыһаан ыытан эрэллэрин истэн үөрэбит уонна махтанабыт”, — диэн Руслан Федотов санаатын үллэһиннэ.
“Амарах сүрэх” түмсүү таба этин сыа сым курдук тутан, ИП Николай Борисовы кытта үлэлэһэн таба этин ыыһаан биэрбиттэр.
“Биир дойдулаахпыт урбаанньыт Николай Спиридонович Борисовы көрдөспүппүтүгэр кини быһа гыммакка, “Мясной двор” тэрилтэни кытта кэпсэтэн, табабыт этин ыыһаан биэрдэ. Ону биһиги барытын түмсүүбүт волонтера Анна Устиновна Александрованы кытта анал ваакумнай аппаракка суулаатыбыт. Уопсайа 150 оннук ваакумнаммыт таба этэ буолла. Аппараты уонна анал хоһу Николай Спиридонович булан биэрбитэ. Бу иннинэ кини өссө убаһа этин эмиэ буһаран да, ыыһаан да уолаттарга диэн тириэрдибитэ Биһиги маннык амарах сүрэхтээх дьонноохпуттан олус үөрэбит уонна дириҥник махтанабыт” , — диэн Римма Васильевна махтал тылларынан көмөлөһөр дьонун аҕынна.
Ыыһаммыт бородууксуйаны анал байыаннай дьайыы буола турар сиригэр командировкаҕа барыахтаах улуус дэлэгээссийэтэ тириэрдиэхтээх.
“Амма олоҕо” хаһыат