Ил Дархан Гранын кыайыылааҕа “Amgarun” бырайыак тэрээһинигэр Болугур нэһилиэгин олохтоохторо, дьиэ кэргэттэрэ көхтөөхтүк кытыннылар. Тэрээһиҥҥэ нэһилиэк баһылыга Андрей Петров улахан дьиэ кэргэнинэн эмиэ кыттан холобур буолла.
“Amgarun”кырааскалаах экологическай сүүрүү үһүс төгүлүн Болугур нэһилиэгэр өрө көтөҕүүлээхтик буолан ааста. Уопсайа Болугур, Амма Наахара нэһилиэктэриттэн 28 дьиэ кэргэн кыттыыны ылан, үөрэн, ситиһиилэнэн бардылар. Ол курдук 1 миэстэни Амма Наахараттан Мария, Василий Максимовтар кыыстара Саиналыын ыллылар. 2 миэстэҕэ Болугуртан Айураана, Прокопий Шестаковтар, 3 миэстэҕэ Марк, Максим, Дамир, Евгений Кузьминнар дьиэ кэргэн таҕыстылар.
Ону тэҥэ пластиковай хаппаҕы мунньан туттарыыга эмиэ күрэх ыытылынна. Манна Артем Николаев, Ньургун Шилов уонна Даниил Кожуров хамаандалара 7 киилэ хаппаҕы мунньан кыайыылааҕынан таҕыстылар. 2 миэстэни 6 киилэ хаппаҕы туттаран Виктория Яковлева, 3 миэстэни 3 киилэ 4 грамм хаппахтаах Валерия Максимова ыллылар. Бу күн оҕолорго саастарынан сүүрүүгэ туспа күрэхтэр буоллулар. Кыайыыны ситиспит оҕолорбутугар эҕэрдэбитин тириэрдэбит, көхтөөх дьоммутугар махтал буолуохтун. Бу экологическай сүүрүүгэ нэһилиэкпит баһылыга Андрей Никитич Петров улахан дьиэ кэргэнинэн кэлэн кыттан бэйэтинэн холобур буолбутун бэлиэтиибит.
Евдокия ПЛАТОНОВА