Амматааҕы Ф. Потапов аатынан норуот айымньытын дьиэтигэр Амма нэһилиэгин кырдьаҕастарын Сэбиэтэ аҕам саастаахтарга уонна ыалдьыттарга диэн бэртээхэй тэрээһини тэрийдэ. Кинилэргэ норуот айымньытын дьиэтин үлэһиттэрэ күүс-көмө буолан ытык дьон махталын ыллылар.
Бырааһынньыгы бэлиэтиир күҥҥэ бэйэлэрин эҕэрдэ тылларын Амма нэһилиэгин баһылыга Михаил Артемьев, улуус бэтэрээннэрин Сэбиэтин бэрэссэдээтэлэ Мария Захарова уонна нэһилиэк бэтэрээннэрин Сэбиэтин бэрэссэдээтэлэ Наталья Дьячковская тириэртилэр.
“Биһиги Аан дойдутааҕы аҕам саастаахтар күннэрин бэлиэтиир декада иһинэн күрэхтэһиилэрдээх, аралдьытар тэрээһиннэрдээх ыыттыбыт. Ол курдук аҕам саастаахтарбыт ортолоругар “Супер бабушка” диэн үс түһүмэхтээх күрэх ыыттыбыт. Ол курдук кыттааччылар бэйэлэрин билиһиннэрдилэр, талааннарын көрдөрдүлэр уонна киэһээҥҥи былааччыйаларынан хаамтылар. Манна кыайыылааҕынан Анастасия Давыдова буолла. Иккис миэстэ Клара Малыкайцева уонна үһүс миэстэ Ксения Алексеева.
Маны тэҥэ саастарынан арааран спорт саҥа көрүҥэр холоннулар. Ол курдук Алексей Матвеев корнхол диэн көрүҥҥэ күрэхтэһиини тэрийдэ. Онно дьахталлар 65 саастарыгар диэри бастакы миэстэ Нина Устинова, иккис миэстэ Дария Иванова, үһүс миэстэ Ксения Алексеева, 66 саастарыттан үөһээҕэ кыайыылаах Валентина Андреева буолла. Иккис миэстэҕэ Галина Чемезова, үһүс миэстэҕэ Матрена Федорова таҕыстылар. Онтон 70 саастарыгар диэри эр дьоҥҥо Михаил Неустроев кыттааччылар киирбэккэлэр бастакы миэстэни быһа ылла. 71 саастан үөһээлэргэ спорт бэтэрээннэрэ Иван Бураев бастакы, иккис миэстэ Егор Иванов иккис уонна үһүс миэстэ Алексей Матвеев буоллулар. Аны кыраҕы хараҕы быһаарар дартс күрэҕэ тэриллэн Павел Алексеев ыытта. Манна эр дьоҥҥо кыайыылаахтарынан Егор Иванов, Иван Бураев, Павел Алексеев буоллулар. Ырыа күрэҕэ эмиэ бэрт сэргэхтик барда. Манна бастакы миэстэни Дария Томская, иккис миэстэни Анна Васильева уонна үһүс миэстэни Нина Филиппова ыллылар.
Аҕам саастаахтар киэһэлэрин Косиор Карманов уонна Ильяс Завровняев ылбаҕай ырыаларынан киэргэтэн, эҕэрдэлэрин тириэрдэн бэртээхэй бэлэх оҥордулар. Норуот айымньытын дьиэтин исписэлиистэрэ тэрээһиммитин кыайа тутан ыыппыттарыгар истиҥник махтанабыт”, — диэн Наталья Кононовна сырдатта.
Бу курдук аҕам саастаахтар кэлэн сэргэхсийэн, бэйэ бэйэлэрин кытта кэпсэтэн, сонуннарын үллэстэн бэркэ астынан тарҕастылар.
“Амма олоҕо” хаһыат