Амма “Арассыыйатын ийэлэрэ” бэһис төгүлүн бастыыры ситистэ

 «Арассыыйа ийэлэрэ»  уопсастыбаннай хамсааһын Амма улууһугар салаата 2023 сыл түмүгүнэн өрөспүүбүлүкэҕэ бастыҥ үлэлээҕинэн бэлиэтэннэ.  Уопсастыбаннай түмсүү бу үрдүк ааты бэһис төгүлүн субуруччу ылары ситистэ.

“Түмсүүбүтүн Оксана Ивановна Архипова тэриллиэҕиттэн салайан кэллэ. Өрөспүүбүлүкэҕэ хамсааһыны  Прасковья Петровна Борисова сүрүннүүр. Бу соторутааҕыта түмсүүлэр түмүктэрин таһаарыы буолла. Ааспыт 2023 сылга  үлэ түмүгүнэн биһиги салаабыт бэһис төгүлүн бастакы миэстэҕэ тигистибит. Ыытыллар үлэ хайысхаларын регионнааҕы «Арассыыйа ийэлэрэ» салаата былааннаан туорумнуур. 2023 сыл «Үлэ- албан аат» сылынан туһаайыллыбыта. Араас тэрээһиннэр, конкурстар, түмсүүлэр сыллата үрдүк таһымҥа ыытыллаллар. Ааспыт нэдиэлэҕэ, куйаар ситиминэн «Арассыыйа ийэлэрэ» региональнай салаатын  отчуота ыытылынна. Отчуоту дириҥ ис хоһоонноохтук, ыытыллыбыт үлэлэри сырдатан Прасковья Борисова оҥордо.

 

Отчуокка эдэр ийэлэргэ аналлаах анал лекциялар, бэсиэдэлэр, дьарыктар ыытыллыбыттара бэлиэтэннэ. «Үүнэр көлүөнэ Фондатын” өйөбүлүнэн «Герой оҕолор» бырайыагынан өрөспүүбүлүкэттэн 11 оҕо наҕараадаланнылар. Олор истэригэр Болугур орто оскуолатын 6-с кылааһын үөрэнээччитэ  Юлиан Семенов баар. Маны таһынан уолаттарга, кыргыттарга ситиһиилэрин бэлиэтээннэр ааттаналлар. Улуустарынан ыытыллыбыт үлэлэри бэлиэтээннэр, араас дьаһалларга, көрүүлэргэ, акцияларга актыыбынайдык кыттаммыт, үлэбит сыаналанан, анал  Кубогынан уонна дипломунан бэлиэтэннибит. Ордук «Үлэ аргыстаах эдэр саас» бырайыакка күүскэ үлэлээммит, улахан сэҥээриини, биһирэбили ыллыбыт. 2-с миэстэҕэ Сунтаар улууһа, 3-с миэстэҕэ Булун улууһа таҕыстылар. Үлэбит салгыы Дьиэ кэргэн, Оҕо саас сылларыгар туһаайыллан  өссө киэҥ, дириҥ ис хоһоонноохтук ыытыллыахтара”, — диэн педагогическай үлэ бэтэрээнэ, «Үлэ аргыстаах эдэр саас» бырайыак сүрүннээччитэ Галина Бочугурова үөрүүтүн үллэһиннэ.

“Амма олоҕо” хаһыат