Аммаҕа ыытыллар Олоҥхо ыһыаҕын көрсө ыытыллар үлэлэртэн биир саамай кыһалҕалаахтарынан суолбут туруга буолар. Амма – Чапчылҕан икки ардынааҕы трасса, төһө даҕаны кылгас буоллар, элбэх суоппары “ытатар”. 2019 сыллаахха Саха сирин норуоттарын Оонньууларын көрсө хапытаалынай өрөмүөн ыытыллыбытын үрдүнэн, ол кэмтэн ордук сайыҥҥы өттүгэр барыта охсуу буолан эрэйи көрдөрөр. Маны быһаарар инниттэн “РИК Автодор” АУо Амматааҕы салаата бу хайысхаҕа өрөмүөн ыыппыта нэдиэлэ буолла.
Өрөмүөн хайдах бара турарын бүгүн суолга тиийэн улуус баһылыга Степан Кузьмин билистэ.
Үлэни ыытар тэрилтэ салайааччыта Александр Филипповы көрсөн туох оҥоһуллубутун, грейдер кэнниттэн икки күнүнэн массыына айаннаабыт буолар суола көнүөҕү-суоҕун билистэ.
-Үлэ технологията оннунан хаалла, ол оннугар холоон көрүү быһыытынан туттар матырыйаал састаабын уларытан үлэни ыытабыт. Барыта табылыннаҕына үлэ бүгүн киэһэ түмүктэниэхтээх. Сакаасчыт тутан баран, техника сырыыта саҕаланнаҕына кэтээн көрүөхпүт. Салгыы бу матырыйаалы туттар табыгастаах дуу суох дуу диэн түмүк оҥоһуллуо. Инникитин бу учаастак аспалланыахтаах: эһиил, эбэтэр онтон эһиил диэн былааннанар,- диэн тэрилтэ салайааччыта Александр Аркадьевич кэпсээтэ.
Нэдиэлэ устата барбыт өрөмүөҥҥэ 10 үлэһит, грейдер, погрузчик, 4 самосвал, уу кутар массыына үлэлээннэр болдьоммут кэмигэр үмүрүтэн эрэллэр.
“Амма олоҕо” хаһыат.