Амматааҕы Н.С. Захаров-Сахаачча аатынан оҕо спортивнай оскуолатын иитиллээччилэрэ Владивосток куоракка ыытыллыбыт Бүтүн Арассыыйатааҕы турнирга бириистээх миэстэлэри ыллылар.
“Бу турнирга уопсайа 500 кыттааччы кэлбит. Ол курдук Азербайджан, Армения, Монголия, Белоруссия, Дагестан, Чечня өрөспүүбүлүкэлэриттэн, Приоморскай, Хабаровскай кыраайтан, Еврейскэй Автономнай уокуруктан, Амурскай уобаластан уонна Саха сириттэн эдэр тустууктар тиийэн күрэхтэстилэр. Оҕолорбут куһаҕана суох көрдөрүүнү ситистилэр. Ол курдук Амматтан Дархан Макаров, Абаҕаттан Андрей Осипов, Соморсунтан Эрчимэн Дмитриев боруонса, Алтантан Даниель Сутаков, Амматтан Максим Андросов үрүҥ көмүс уонна Амматтан Коля Никифоров, Слава Окороков кыһыл көмүс мэтээл хаһаайыннарынан буоллулар.
Бу иннинэ уолаттар эмиэ Белогорскай куоракка Бүтүн Арассыыйатааҕы турнирга ситиһиилээхтик кыттыбыттара. Маннык элбэх турнирдарга кыттан кинилэр улахан уопут ылаллар. Миэстэҕэ да тиксибэтэхтэринэ, атын дойду бөҕөстөрүн кытта киирсэн элбэҕи биллэллэр, иҥэринэллэр. Онон күрэхтэһиилэргэ барарбытыгар өрүүтүн көмөлөһөр, “Азия оҕолоро” оонньууларын боруонса призеругар, өрөспүүбүлүкэ кыайыылааҕар Мичил Егоров күрэхтэһиигэ кыттарыгар күүс-көмө буолбут “Утум” атыы эргиэн киинин дириэктэригэр Людмила Еремеевна Куприяноваҕа тренердэр уонна төрөппүттэр ааттарыттан улахан махталбытын биллэрэбит. Ону кытта биллэн туран оҕолорун туһугар кыһаллар, кинилэр күрэхтэһиилэргэ баралларыгар өрүү өйөбүл буолар төрөппүттэрбитигэр биһиги тренердэр улаханнык махтанабыт. Маны тэҥэ кэлэ бара айаммытыгар сымнаҕастык илдьэ сылдьар Амматааҕы лиссиэй суоппарыгар Христофор Христофорович Слепцовка, Болугур орто оскуолатын суоппарыгар Илья Михайлович Ивановка эмиэ махтанабыт”, — диэн Амматааҕы оҕо спортивнай оскуолатын тренерэ Степан Скрябин санаатын тириэртэ.
Эдэр тустуук уолаттарбытын ситиһиилэринэн эҕэрдэлиибит. Бу курдук Аммаҕытын ааттата туруҥ.
“Амма олоҕо” хаһыат