Амма оскуолаларын биисэнэс-инкубатордарын резиденнэрэ Саха Өрөспүүбүлүкэтин үөрэхтээһиҥҥэ уонна наукаҕа, Саха Өрөспүүбүлүкэтин урбааҥҥа, эргиэҥҥэ уонна туризмҥа министиэристибэлэрэ уонна «Юные якутяне» тирэх киин тэрийиилэринэн сыл аайы ыытыллар өрөспүүбүлүкэтээҕи быыстапка-дьаарбаҥкаҕа кытыннылар.
Эдэр урбаанньыттар элбэх саҥаны көрдүлэр-иһиттилэр, эспиэрдэргэ биисэнэс бырайыактарын көмүскээтилэр, санааларын эттилэр.
Лена Кузьмина, Амма 2 №-дээх орто оскуолатын биисэнэс-инкубаторын салайааччыта:
Биһиги оскуолабыт 6 кылааһын үөрэнээччилэрэ Алёша Быскасов уоннаөТимур Семёнов маннык улахан түһүлгэҕэ аан маҥнай кытыннылар, үрдүк таһымнаах экспиэрдэр иннилэригэр бырайыактарын көмүскээннэр грамота туттулар. «Мин – Саха сирин оскуолатааҕы биисэнэс-инкубаторын резиденэбин» диэн аһаҕас микрофоҥҥа оҕолор дьарыктарын, бородууксуйаларын туһунан кэпсээтилэр, биир саастыылаахтарыгар ыйытыылары биэрдилэр.
Атын оскуолалар гиипсэттэн оҥоһуктары, дьиэни ыраастыыр хомулуктары, эмтээх оттору, чэйдэри, чүмэчилэри, бэйэлэрэ оҥорбут мыылаларын, бэстэн экобоксалары, араас бородууксуйалары туруордулар. В.П. Ларионов аатынан Майа орто оскуолата күүскэ үлэлиир эбит диэн көрдүм. Манна барыта 10 учуутал биисэнэс-инкубаторынан дьарыктанар. Үлэ таһаарыылаах буоларын туһугар тэрилтэлэри кытта дуогабар түһэрсэллэр эбит. Мин оҕолорбунаан И.Г. Тимофеев аатынан Майа лиссиэйэ 3Д принтеринэн оҥоһуктарын сэҥээрдибит. Оҕолор бу тэрилинэн оҥоһуута өр буоларын, холобур, илин кэбиһэр үс нэдиэлэ курдук бэчээттэнэн хомуллар диэн кэпсээтилэр.
Уолаттарбыттан хаһыс кылаас кэнниттэн үөрэххэ уонна ханнык хайысханан барыаххытын баҕараҕыт диэн ыйыппыттарыгар Тимур Семёнов эрдэ атахпар турар сыалтан 9 кылаас кэнниттэн үөрэххэ барыам диэтэ. Оттон Алёша Быскасов 11 кылаас кэнниттэн элбэх араас үөрэххэ киирэр кыахтанабын диэн хоруйдаата. Уолаттар техническэй хайысханан барар баҕалаахтарын, урбаанньыт да буолуохтарын сөбүн эттилэр. Холобур, Аммаҕа Аллараа Бэстээххэ түүннэри үлэлиир «Азия» курдук улахан супермаркет, кафелар суохтар. Оттон Аммаҕа сайын элбэх киһи, турист кэлэр, онон киһи бөҕө атыылаһыах этэ диэн санааларын үллэһиннилэр. СӨ биисэнэс-инкубатордарын салайааччыта Наталья Михайловна Герасимова биһиги оҕолорбутугар бэйэ оҥоһугун интэриниэт, көрдөрөр-иһитиннэрэр ньымаларынан дьон билиитигэр күүскэ таһааралларыгар, Амма кэрэ айылҕатын туһунан өссө элбэх сувенирдары оҥороллоругар баҕа санааларын эттэ.
Анастасия Алексеевна Федорова, Соморсун орто оскуолатын биисэнэс-инкубаторын салайааччыта:
Соморсун оскуолатыгар «Ручная магия» диэн ааттаах биисэнэс-инкубаторга оҕолор бэһис сылын мыыланы оҥоруунан дьарыктаналлар. Бу дьарыгы төрүттээччинэн Анджелина Лебедева буолар. Кини 9 класс кэнниттэн Дьокуускайдааҕы финансовай-экономическай кэллиэскэ киирбитэ. Оҕолор төрөппүттэрин көмөлөрүнэн 100 устуука мыыла быласымаас уонна силиконовой киэптэрин атыылаһаннар эгэлгэ бэйэлээх араас быһыылаах, дьүһүннээх мыылалары оҥорон таһаараллар. Мыылабыт састаабын Дьокуускай куораттан «Олонхо», «Атлант» атыы-эргиэн кииннэриттэн атыылаһабыт. Амма дьэдьэнэ сыттаах мыыла араас хомулуктарын, биирдиилээн мыыланы оҥорон 150-200 солкуобайга атыылыыбыт. Мыыла састаабыгар оҕолор киирэр матовай уонна дьэҥкир мыылаҕа глицерини, мүөтү, прополиһы, араас сыттары, аска туттуллар кырааскалары туһаналлар.
Маны таһынан кыргыттар быйылгыттан саҕалаан бискибиит, мүөттээх, кыһыл баархат, сакалаат уо.д.а. туортары астаан нэһилиэнньэҕэ атыылаан дьиэ кэргэн дохуотун хаҥаталлар. Оҥорор туортарын ынах сибиэһэй үүтүнэн, арыытынан оҥороллор. Ахсыс кылаас кыргыттара Алина Максимова, Сайыына Федорова «Дьиэ усулуобуйатыгар мыыланы оҥоруу», Валерия Николаева, Даайа Давыдова (9 кылаас) «Туорду оҥоруу» диэн биисэнэс былааннарын кэпсээтилэр. Пуорум тэриллэн оскуола биисэнэс-инкубатордарын муспута наһаа үчүгэй, туһалаах буолла. Элбэҕи билэн –көрөн, атыттар тугунан дьарыктаналларын сиһилии билсэн, элбэх уопуту ыллыбыт. Тэрийээччилэр оскуола үөрэнээччилэрин 80 бырыһыана биисэнэс-инкубаторынан хабыллыахтаахтар, оттон оскуоланы бүтэрээччилэр 25 бырыһыаннара техническэй үөрэхтэргэ киириэхтээхтэр диэн тоһоҕолоон эттилэр.»
- Алтана АРТЕМЬЕВА,
- Үөрэх салалтатын иитэр үлэҕэ уонна эбии үөрэхтээһиҥҥэ салаатын сүрүннүүр исписэлииһэ.