Ахсынньы 11-16 күннэригэр Приморскай кыраай Лесозаводск куоратыгар 2012-2013 с.т. оҕолорго волейбол күрэҕэр бастакы нүөмэрдээх Амма орто оскуолатыттан Елена Константинова дьарыктыыр үөрэнээччилэрэ ситиһиилээхтик кыттан кэллилэр. Эдэр волейболистар сэтинньи ыйга Майаҕа ыытыллыбыт илиҥ эҥэрдэр күрэхтэригэр 1-кы миэстэни ылан ДФО кыттар чиэстэммиттэрэ.
Ол туһунан уолаттары дьарыктыыр Елена Николаевна маннык сэһэргиир «Манна бастакы нүөмэрдээх Амма орто оскуолатыттан 11 волейболист уонна Сулҕаччы орто оскуолатыттан Сардаана Христофорова дьарыктыыр икки үөрэнээччитэ кыттыннылар. Барыта 12 хамаанда кытынна. Амматтан ураты бары спортивнай оскуола, олимпийскай резервалар хамаандалара күрэхтэстилэр. Биһиги оҕолорбут 4 миэстэ буолан инники эрэллээхтэрин, оонньуур кыахтаахтарын көрдөрдүлэр. Уопсай түмүгүнэн 6«а» кылаас үөрэнээччитэ Арсен Федоров «Бастыҥ оонньооччу» анал аат хаһаайына буолан хамаанда сүргэтин көтөхтө. Бу күрэххэ оскуола дириэктэрэ Юрий Егорович Шишигин, спонсор Станислав Семенович Терентьев, бары төрөппүттэр өйөөн, оҕо инникитин өйдөөн ыыппыттарыгар махтанабын.
Онтон ахсынньы 20-22 күннэригэр 2010-2012 с.т. оҕолору кытары Хабаровск куоракка Саҥа дьыллааҕы күрэххэ кытынныбыт. Манна эмиэ 12 хамаандаттан 7-с миэстэ буоллубут. Бу ааһан эрэ сылга дьарыктыыр оҕолорум ситиһиилэриттэн олус үөрэбин, оҕолорбунан киэн туттабын. Саҥа дьылынан! Саҥа сылга өссө үөрэххэ, спортка, тус бэйэлэригэр үрдүктэн үрдүк ситиһиилэр кэлэ турдуннар».
Эдэр волейболистарга Амманы өссө да волейбол күрэхтэригэр ааттата турун диибит. Успуор чыпчаалыгар тахсарга инникигэ ситиһиилэр элбэх үлэнэн кэккэлэһэн кэллиннэр. Кытаанах доруобуйа, барыга бэрээдэк олоххут аргыһа буоллун буоллун диэн Саҥа дьыл дьиктилээх күннэригэр баҕа санаа бастыҥын ыытабын.
Ирина Корякина-Олесова,
Амма Наахара