Амма кийиитэ дойдутун дьонуттан ураты бэлэх тутта

Биллэр модельер Августина Филиппова талааныгар сүгүрүйээччилэрин, биир дойдулаахтарын, култуура эйгэтин үлэһиттэрин ортолоругар үбүлүөйдээх сылын „Кэрэни түстээччи“ айар киэһэнэн бэлиэтээтэ. „Хотугу сулус“ уордьан кавалерын Амма улууһун делегацията эҕэрдэлээн дириҥ ис хоһоонноох бэлэҕи — үрүҥ көмүс кыптыыйы ууннулар.

Кэрэни үксэтээччи, кэрэни тарҕатааччы дизайнер айар киэһэтэ эмиэ ураты, театрализованнай көстүүлээх, дизайнер айбыт биллэр көстүүмнэрин көрдөрүүлээх буолла. Амма оройуонугар ханыылаан оҥоһуллубут Кыыс Амма, сэлиэһинэй бурдук, сардаана сибэкки көстүүмнэр эмиэ үбүлүөйдээх киэһэни киэргэттилэр.

Амма улууһун бочуоттаах олохтооҕун улуус баһылыгын социальнай эйгэҕэ солбуйааччы Нюргуяна Илларионова,  улуус культураҕа салалтатын салайааччы Иван Иванов, Болугур нэһилиэгин баһылыга Андрей Петров, Амма тимир уустарын түмсүүтүн салайааччыта Роман Алексеев уонна норуот маастара Валентина Стручкова — Сарыада Уус эҕэрдэлээтилэр. Сүбэлэһии, өр толкуйдааһын кэнниттэн аммалар Августина Николаевнаҕа Кулун атах култууратын кытта сибээстээн Сырдык сириттэн Саха сиригэр бастакы булуллубут кыптыый моһуонунан амматтан төрүттээх, тимир уустарын Сойууһун толорооччу дириэктэрэ Александр Терентьев — Айгын Уус оҥорбут кыптыыйын бэлэхтээтилэр.

Бу кыптыыйы аан бастаан быыстапкаҕа көрөөт, чуо Августина Филипповаҕа анаммыт диэн өй тута көтөн түспүтэ. Онтон тоҕоостоох түгэн көстүбүтүгэр «Якутский ювелир» тэрилтэ үрүҥ көмүс киллэригэр анаан Айгын Уус  дьэбиҥҥэ бэриммэт тимиртэн охсон уонна  Амма Сатаҕайын удьурхайын холбоон, ситэрбит бу хатыламмат оҥоһугун бэлэх уунуохха диэн этиини улуус салалтата тута өйөөн үөрүүлээх быһыыга-майгыга бар дьон ортотугар бэлэх ууммуппут долгутуулаах. Бу буолар — тыйыс усулуобуйаҕа олорор саха иистэнньэҥнэрэ, уустара, талааннаах дьоно омук культуратын сайдыытыгар бииргэ үлэлээһиннэрин туоһута. Кыптыый философията ис иһигэр киирдэххэ олус дириҥ өйдөбүллээх, сахалар иискэ, ууска быһыы-таһаа оҥорор ураты оҥоһуктара буоллаҕа.  Кыптыый угулла сылдьар маллаах иһитэ эмиэ туспа уратылаах. Айгын уус хос эбэтин маллаах иһитин майгыннатан туостан тигиллибит. Биир дойдулаахпыт Александр Терентьев кыптыый Августина Филипповаҕа барарын билэн бэлэх ууммутугар махтанабыт,- диэн улуус тимир уустарын түмсүүтүн салайааччыта Роман Алексеев санаатын үллэстэр.

Манна даҕатан эттэххэ, эһиил улууспутугар ыытыллар Олоҥхо ыһыаҕар тэрийэр бөлөх тимир уустарын күрэҕэр Кулун атахтарын тимир уустарыгар сүгүрүйүүү бэлиэтинэн кыптыыйы оҥорууну киллэрдилэр.

„Амма олоҕо“ хаһыат.

 

Читайте дальше