Аҕыйах хонугунан Амма улууһугар адаптивнай спорт көрүҥнэригэр спартакиада саҕаланыа. Бу улахан спортивнай тэрээһини көрсө улуус кыраныыссатыттан, Дорообо алаастан тупсарыы үлэтэ күргүөмнээхтик ыытылынна. Манна саҥа туалет, бетоннааһын үлэлэрэ Амма улууһун дьаһалтатын, МЧС байыастарын уонна Эмис нэһилиэгин эр дьонун күүһүнэн барда. Субуотунньукка улуус баһылыгын тутууга солбуйааччы Виктор Смирников уонна Эмис нэһилиэгин баһылыга Прокопий Бубякин быһаччы кыттыыны ыллылар.
«Амма аартыга, улууспут сирэйэ – ааттыын Дорообо алааска турар кыраныыссаҕа икки күн, сүрдээх интэриэһинэй, сэргэх, иллээх наһаа үчүгэй үлэ ааспытыттан астына олоробун. Амма сэлиэнньэтиттэн кэлбит бэрт үлэһит уолаттары кытта «эн-мин» дэһэн бэрт эйэлээхтик үлэлээтибит. Эмистэр үлэһиппитинэн хаалсыбат дьон буоллахпыт. Хайа эрэ өттүнэн историческай түгэн буоллаҕа. Эбийиэкпит этэҥҥэ уонча-сүүрбэччэ сыл турдаҕына, үлэлээбит киһи кэлэ-бара “бу мин оҥорсубут тутуум ээ” диэн иһигэр киэн тутта саныаҕа. Улуус баһылыга Степан Кузьмин сорудаҕынан, сыаналаах матырыйаалы үбүлээһинэн, баһылыгы солбуйааччы Виктор Смирников быһаччы тэрийиитинэн уонна салайыытынан Аммабыт аартыгар киһи киэн туттар үчүгэй үлэтэ барда. Кини бэйэтин хамаандатын — улуус дьаһалтатын, МЧС филиалын үлэһиттэрин, уопсайа уон алта киһини аҕалан күүстээх үлэ барда. Манна даҕатан эттэххэ улууска тутууга баһылык солбуйааччыта, Виктор Смирников уонна Эмистэн Вячеслав Гаврильев төрөөбүт күннэригэр үлэлээтилэр. Кинилэргэ дьаһалта, депутаттар ааттарыттан махтанан уонна эҕэрдэлээн бэлэх туттартаатым. Сүрдээх боростуойа суох үлэ буолла. Бетоннааһын үлэтигэр сүрдээх элбэх техника, ол курдук кран, бетономешалка, куопсуктаах трактор, мотопомпа, барыта хамсыыр. Аны саҥа туалет дьааматын сирэ 50 см эрэ ирбит, барыта бадараан буолан үлэһиттэртэн дьулууру эрэйдэ. Ким да толлон турбакка түсүһэн, үлэ кыайтарда. Биһиги нэһилиэктэн Николай Ноговицын, Семен Устинов, Вячеслав Гаврильев, Владимир Прохоров, Василий Гаврильев, Максим Бубякин, Ньургун Устинов (трактор), Назар Васильев (трактор), Илья Пестерев (трактор), Степан Наумов, Анжелика Иванова, Галина Куприянова, Нонна Ноговицына, Николай Захаров, Гаврил Захаров, Алексей Захаров, Николай Гаврильев кыттаннар Дорообо алааспыт, кыраныыссабыт саҥалыы көрүҥнэннэ. Аммаҕа сылдьыбыт эрэ киһи кэрэхсии, ытыгылыы, харыстыы эрэ сыһыаннастын. Үгүс сылларга Аммабыт аартыга саҥалыы тутуунан дьэргэйэн турдун диэн баҕа санаабын этэбин, — диэн Эмис нэһилиэгин баһылыга Прокопий Бубякин санаатын үллэһиннэ.
Прасковья Бубякина
