Дуобакка Амма улууһун үөрэнээччилэрин ортолоругар биирдиилээн уонна хамаанданан бастыыр иһин күрэх ыытылынна. Күрэххэ 10 оскуола уонна Николай Захаров — Сахаачча аатынан Амма спортивнай оскуолатын хамаандата кытыннылар. Хамаанда састаабыгар алталыы үөрэнээччи оскуолаларын аатын көмүскээтилэр.
Бу күрэххэ быйыл 40-ча оҕо биирдиилээн бастыыр иһин күрэххэ кытыннылар. Бастыҥ тренер Валерий Гаврильев дьарыктыыр Амма Наахара үөрэнээччилэрэ күрэххэ толору састаабынан кыттан үрдүк ситиһиини көрдөрдүлэр. Кырачаан, саҥа саҕалаан эрэр дуобатчыттар 1-кы кылаастан Сандал Устинов, Максим Пахомов бастыкы күрэхтэһиилэригэр кыттан буһан-хатан кэллилэр. Манна бэйэтин саастыылаахтарыгар бастакытын кыттыбыт 5 кылаас үөрэнээччитэ Сайнаара Пахомова маҥнайгы миэстэҕэ тахсан чемпион үрдүк аатын ылла. 5 кылаас үөрэнээччитэ София Заборовская эмиэ бэйэтин кыаҕынан оонньоото. Маны тэҥэ араас күрэхтэргэ кыттар улахан, орто саастаах дуобатчыттар ситиһиилиин сиэттистилэр. Кыра саастаах 3-с кылаас үөрэнээччитэ Аэлита Александрова 2-с миэстэни ылла. Онтон 2-с кылаас үөрэнээччитэ Тунаара Кузьмина иккитэ тэҥнэһэн 3-с миэстэни ылла. Бу барыта Ангарск куоракка ыытыллыбыт Бүтүн Арассыыйатааҕы «Ангарскай күһүн» дуобат күрэҕэ үтүө түмүктэрэ буолаллар диэн сыаналыыбыт. «Эдэр кэскиллээх оонньооччуларым ситиһиилэрэ кэлэн иһиэ!»- диэн Валерий Иванович кыргыттарыттан үөрэр.
Биирдилээн бастыыр иһин күрэхтэһиигэ 10 кылаас туйгун үөрэнээччитэ Виола Сергеева, 6 кылаас туйгун үөрэнээччитэ Сайаана Макарова 1миэстэни ылан кыайыы кынаттаннылар. 8-с кылаас үөрэнээччитэ Дима Ефремов 4-с миэстэни ылла. 11-с кылаас үөрэнээччитэ Мирослав Романов хамаандатыгар наадалаах очколары аҕалла. Хамаандананан күрэххэ 8-с кылаас үөрэнээччитэ Далаана Яковлева оҕо спортивнай оскуолатын хамаандатыгар кыттан 2 миэстэни ылла.
Уопсай түмүккэ Үлэ Дьоруойа П.И. Яковлев аатынан Амма Наахара орто оскуолата спартакиадаҕа дуобакка 1 миэстэҕэ тахсан үрдүк ситиһиилэннэ. Кыра оскуолаларга эмиэ бу көрүҥҥэ 1 миэстэни тахсан кыайыы кынаттанна. Ситиһии, дабайыы кынаттанан дуобатчыттарбыт улууска бастыҥ тренер Гаврильев Валерий Иванович үөрэҕин иҥэринэн олохторугар сөбүлүүр дьарык оҥостуохтара диэн эрэнэбит, сахалыы сиэринэн кистээн кэтээн көрөбүт-истэбит.
Ирина Корякина – Олесова.