Амма Наахара икки көлүөнэ социальнай үлэһиттэрэ

Бүгүн социальнай үлэһит күнэ. Бу идэҕэ дьон олоҕун тупсарар сыаллаах, аһыныгас, тулуурдаах, аламаҕай майгылаах, үтүө санаалаах, дьону кытары биир тылы булар киһи үлэлиир. Кэнники кэмҥэ көмөҕө наадыйар өҥөҕө, дьону өйөөһүҥҥэ, көмө оҥорууга, киһи ыарахан туругар истиҥ сыһыаҥҥа болҕомто ууруллара олус кэрэхсэбиллээх. Саастаах, ыалдьар дьон дьиэлэриттэн тахсыбакка аһынан-үөлүнэн хааччыллыыларыгар, дьиэлэрин ыраастык тутууга, кинилэр доруобайдык үөрэ-көтө олороллоругар барытыгар социальнай үлэһит сүүрэр-көтөр.

Амма Наахара нэһилиэгэр дьоҥҥо эйэҕэс сыһыаннаах Светлана Гаврильевна Артамонованы билбэт киһи суоҕа буолуо. Светлана Гаврильевна нэһилиэк социальнай харалтатын үлэһитинэн 2001 сылтан 22 сыл илиитин араарбакка үлэлээн-хамсаан, үлэтинэн бэйэтин аатын үрдүктүк ааттатан Бочуоттаах сынньалаҥҥа олорор.

22 сыл… Көрдөххө дөбөҥ, онтон күннэтэ үлэлээтэххэ уһун бириэмэ. Тулуурдаах, үтүө суобастаах өр сыллаах үлэ түмүгүнэн Светлана Гаврильевна Үлэ бэтэрээнэ, Социальнай сулууспа туйгуна, Үлэ министиэристибэтин, Ил Түмэн Бочуотунай грамоталардаах, 2003 сылга улуус иһинэн ыытыллыбыт социальнай үлэһиттэр күрэхтэригэр  иккис миэстэлээх, онтон

2006 сыллаахха улууска ыытыллыбыт социальнай үлэһиттэр күрэхтэригэр «Көрөөччүлэр биһирэбиллэрэ» анал аат хаһаайката буолар.

Кини «Үлэбэр куруутун үөрэ-көтө барарым, ким эрэ миигин күүтэр диэн өрүү ыксыы сылдьарым. Үлэлээбитим тухары олохтоох дьаһалта, нэһилиэк тэрилтэлэрэ өрүү өйүүллэрэ  күүс-көмө буолбуттарыгар махтанабын»- диир бэтэрээн үлэһит.

Онтон күн бүгүн Амма Наахара нэһилиэгэр пакеттаах, түргэн хаамыылаах эдэркээн кыыһы арыт сатыы, арыт велосипедынан сылдьарын көрүөххэ сөп. Бу эдэркээн кыыс Радамира Пахомова буолар.

Кини ис-иһиттэн үөрэн, түргэн түргэнник туттан маҕаһыыннарга киирэн дорооболоһоот «Хайа дьонум сакааһын хааллардыгыт дуу?» диэн бэрт сэргэхтик саҥардаҕына хайдах эрэ киһи тулата сырдаан кэҥии түһэр. Үтүө киһи эйгэтэ сылааһынан сыдьаайар. Төрөппүттэрэ Валентина, Павел Пахомовтар үлэһит дьон. Оҕолорун кыра эрдэхтэриттэн тэҥҥэ илдьэ сылдьан үлэлэтэн, туохтан да толлон турбат бастыҥ үлэһит дьон оҥордулар. Үлэһит бастыҥа Радамира Павловна юрист идэлээх, нэһилиэккэ социальнай үлэһитинэн ахсынньы ыйтан үлэлиир. Бүгүҥҥү күҥҥэ уон киһини көрөр-истэр. Кыһыҥҥы өттүгэр көрөр дьонугар муус киллэрэн, мас хайытан үлэ бөҕөнү көрүстэҕэ.

Рада иннинэ бу үлэҕэ Светлана Артамонова уһун кэмҥэ илиитин араарбакка, үтүө суобастаахтык  үлэлээбитэ, наставник киһи билигин да Радаҕа күүс-көмө, сүбэ-ама буолар.

Амарах дьоммутун Светлана Гаврильевнаны, Радамира Павловнаны идэлээн күҥҥүтүнэн эҕэрдэлиибит. Рада үлэҥ үтүө түмүктээх, ситиһиилээх буоллун! Бэйэҕитигэр чэгиэн доруобуйаны, этэҥҥэ буолууну баҕарабыт! Эһиги тулуурдаах, элбэх билиилээх уонна үчүгэй, кытаанах доруобуйалаах буоллаххытына эрэ, дьон туһугар ис сылааскытын үллэстэр үлэҕит таһаарыылаах буолар. Светлана Гаврильевнаҕа уонна кини туйаҕын хатарааччыга Радамира Павловнаҕа тулууру, элбэх билиини, дьоҥҥо эйэҕэс тэҥ сыһыаны, эрчимнээх үлэһиттэрбитигэр дьон махталын ылан, сарсыҥҥы күҥҥэ эрэллээх буолууну нэһилиэккит дьоно-сэргэтэ баҕарабыт.

Ирина Корякина — Олесова.

Читайте дальше