Быйыл Үлэ Дьоруойа П.И.Яковлев аатынан Амма Наахара орто оскуолатыгар 12 саҥа үөрэнээччи үөрэх эйгэтигэр үктэннилэр. Билии күнүгэр саҥа бастакы кылаас үөрэнээччилэрин «Дуораанчык» уһуйаантан иитээччилэр Татьяна Ефремова уонна Феодосия Максимова арыаллаан, киллэрдилэр.
Кыракый үөрэнээччилэри үрдүк категориялаах алын сүһүөх учуутала, «Надежда Якутии» бэлиэ хаһаайката Мария Павловна Пахомова үөрэх-билии суолугар сирдиэҕэ. Үөрүүлээх күҥҥэ Амма улууһун дьаһалтатыттан ыччат политикатын уонна социальнай боппуруоһун сүрүннүүр исписэлииһэ Туяра Васильева, Амма Наахара нэһилиэгин аҕа баһылыга Захар Александров, баһылык солбуйааччыта Сахаяна Михайлова, оскуола дириэктэрэ Василий Яковлев эҕэрдэ тыл эттилэр, бэлэх туттардылар. Быйыл ахсыс төгүлүн «Дуораанчык» уһуйаан попечителя Афанасий Алексеев бэлэҕин уһуйаан сүрүннүүр иитээччитэ Галина Мартынова үөрүүлээх быһыыга эҕэрдэ тылын этэн туттарда. Биир идэлээхтэр сойуустарын бэлэҕин оскуола профсоюһун салайааччыта Ирина Олесова, «Дуораанчык» уһуйаан профсоюһун бэрэссэдээтэлэ Ефросинья Пахомова саҥа үөрэнээччилэргэ туттардылар.
Быйылгы үөрэх дьылыгар Амма Наахара орто оскуолатыгар 93 үөрэнээччи үөрэниэҕэ. Дьоро чааһы иитэр үлэҕэ дириэктэри солбуйааччы Марина Макарова, дириэктэр сүбэһитэ Феодосия Максимова иилээн-салайан ыыттылар. Бастакы чуорааны саҥа оскуола боруогун атыллаабыт Мира Романова уонна 11 кылаас үөрэнээччитэ Тит Кузьмин тыаһаттылар. Бу күн нэһилиэк тэрилтэлэрин аатыттан элбэх оҕолоох ыалларга нэһилиэк дьаһалтата «Оскуолаҕа хомунуу» акциятыгар киирбит үөрэххэ туттуллар тэриллэри социальнай педагог Матрена Романова тутта. Бастыҥ үлэлээх учууталлар Михаил Романов, Алена Мартынова, Належда Григорьева наҕараадалары туттулар. Улуус дьаһалтата оскуола бибилэтиэкэтигэр быйыл тахсыбыт олоҥхоҕо аналлаах кинигэлэри бэлэхтээтэ. Билии күнүгэр аналлаах кылаас чаастара, үөрүүлээх линейка элбэх төрөппүтү, ыалдьыты түмтэ.
Ирина КОРЯКИНА-ОЛЕСОВА