Ааспыт сыл түмүгүнэн Өнньүөскэ элбэх ситиһии кэллэ. Бу барыта үлэлэригэр толору эппиэттиир исписэлиистэр түмсүүлэриттэн, бары тэрилтэлэр биир сыалга үлэлээһиннэриттэн, аҕа баһылык Захар Александров сөптөөх дьаһалы ылынан салайарыттан, биир санаалаахтар сомоҕолоһууларыттан буолар. Биир саамай улахан ситиһиибитинэн өрөспүүбүлүкэҕэ физкультурнай хамсааһын 100 сылын, итиэннэ Амма улууһун спортивнай 2023 сылын түмүгүнэн Амма Наахара нэһилиэгэ кыра нэһилиэктэргэ кыайыылаах таҕыста уонна 50 000 солкуобайдаах сертификатынан наҕараадаланан албан аата ааттанна, чөл олохтоох нэһилиэгин дакаастаата.
Нэһилиэккэ спорду өрө тутар дьон үгүс. Биhиги нэhилиэкпититтэн сахалартан бастакынан ССРС спордун маастардара үүнэн тахсыбыттара. Бүгүн долгуйан туран ааттыыбыт биир дойдулаахтарбытын хайыһарга бастакы ССРС спордун маастарын Егор Иванович Григорьевы, греко-римскай тустууга бастакы ССРС спордун маастарын Дмитрий Гаврильевич Максимовы, көҥүл тустууга сахалартан бастакы ССРС спордун маастарын Николай Николаевич Никитины о.д.а. Билигин ыччаттарбыт элбэх көрүҥҥэ спорт маастардара Саха сирин араас муннуктарыгар спорт абылаҥар үгүс оҕону угуйа, үөрэтэ сылдьалларыттан киэн туттабыт. Егор Григорьев аатынан нэһилиэк спортивнай саалатыгар олохтоохтор умсугуйан сылдьаллар. Үс оҕо тапталлаах ийэтэ, эрэллээх кэргэн, барыга сатабыллаах эдэркээн хаһаайка, ырыаһыт бастыҥа, үҥкүүһүт ааттааҕа, спортсмен бэрдэ Мария Заборовская спорду өрө тутар.
Кини 2022 сыл алтынньытыттан спортивнай саала дириэктэрэ буолуоҕуттан саала үлэтэ күөстүү оргуйар. Манна саала сылаас буоларыгар остуорас — хачыгаардар Борис Слепцов, Спиридон Никифоров, Семен Чен дьаныардаахтык үлэлииллэр. Саала өрүү ыраас буоларын Марфа Пахомова ситиһэр. Онтон кыһыҥҥы тымныыга оттук маһынан Эдуард Михайлов хааччыйар. Ааспыт сылга улуус нэһилиэктэрин икки ардыларыгар ыытыллыбыт спартакиадаҕа Амма Наахаралар уопсайа 14 спортивнай көрүҥҥэ күрэхтэстилэр. Мария Заборовская үлэтэ көстөн «Амма улууһун спортка бастыҥ үлэлээх испэсэлииһэ» анал ааты ылбытыгар нэһилиэк хас биирдии ыала тэҥҥэ үөрэн ситим нөҥүө эҕэрдэ эриэккэһэ этилиннэ.
Нэһилиэкпит өссө биир үөрүүтүнэн элбэх оҕону дуобат алыптаах хонуутугар хаамтарбыт, үлэ үөһүгэр сылдьар Николай Захаров-Сахаачча аатынан Амма спортивнай оскуолатын Амма Наахаратааҕы филиалын дуобакка бастыҥ тренера Валерий Иванович Гаврильев СӨ спорт министерствотын түөскэ анньыллар бэлиэтинэн наҕараадаланна.
Нэһилиэккэ күн ахсын сканди торуоскалаах эбэлэри суолга көрсүөххэ сөп. Үлэ чааһын кэннэ ийэлэр, аҕалар спорт саалаҕа дьарыктана ыксалынан хааман иһэллэрин эмиэ көрсө түһүөххэ сөп. Манна түөлбэ үлэтэ эмиэ олохтоохтору түмэр. Бу буолар тыа сиригэр дуоһуйа олоруу, чөл олоҕу тутуһуу, инникигэ күүстээхтик дьулуһуу, үрдүктэн үрдүккэ дабайыы.
Ирина КОРЯКИНА-ОЛЕСОВА