Амма Наахара уһуйаанын 12 иитиллээччи бүтэрдэ

Амма улууһун биир бастыҥ үлэлээх «Дуораанчык» уһуйаан 12 иитиллээччитэ үөрэх эйгэтигэр киирэр долгутуулаах тэрээһинэ буолла. Бэлиэ түгэн уһуйаан бэртээхэй тиэргэнигэр ыытыллынна. Выпускниктар Аммаҕа ыытыллар өрөспүүбүлүкэтээҕи Олоҥхо ыһыаҕын көрсө кэлбит ыалдьыттарга олоҥхоттон быһа тардан туруорууларын көрдөрдүлэр.


«Баар буоллун өрүү күммүт!
Баар буоллун өрүү халлаан!
Баар буоллун өрүү Ийэм!
Баар буолуум өрүү Мин!», — диэн оҕо саас кэрэ ырыатыгар ылланар. Оҕо, оҕо барахсан кыраттан үөрэн, кыраны улаатыннара көрөн, ыраахтан чуопчаарар саҥата иһиллэриттэн ама ханнык киһи манньыйбата буолуой. Амма Наахара нэһилиэгин «Дуораанчык» уһуйаанын быйылгы үөрэх сылыгар 12 оҕо бүтэрэн оскуолаҕа үөрэнэ киирэр. Кырачааннары СӨ үөрэҕириитин туйгуна, үрдүкү категориялаах иитээччи Татьяна Ефремова, эдэр иитээччи Феодосия Максимова, иитээччи көмөлөһөөччүлэринэн  Марианна Кононова, Фекла Илларионова, Күннэй Михайлова үлэлээн кэллилэр.

Иитээччилэр ийэлии сыһыаннаах, барыга сатабыллаах буолан оҕолор бары өттүттэн сайдан, ситэн оскуола боруогун атыллыахтара. Оҕо туһугар үлэлиир талааннаах кэлэктиип уһуйаан тиэргэнигэр аҕыйах хонуктааҕыта тутуллубут саҥа саха балаҕана быһыылаах кэнсиэрдиир сыанаттан Аммаҕа Олоҥхо ыһыаҕын көрсө Былатыан Ойуунускай «Туналҕаннаах ньуурдаах Туйаарыма Куо» олоҥхоттон быһа тардан көрдөрбүттэрэ.

Манна уһуйаан оҕолоро өрүү бырааһынньыктары иллээхтик тэрийэр үлэһиттэри үөрэ көрсөн сахалыы тыыҥҥа иитиллибиттэрэ. Бу күн оҕолор саҥа сыанаҕа ис сүрэхтэриттэн үөрэн, долгуйан туран кыттыбыттарыттан олус астынныбыт. Бэлэмнэнии бөлөх оҕолоро ыллаан-туойан, сыанаҕа бэрт диэнник тутта-хапта сылдьаллара тута харахха быраҕыллар. Оҕолорго кэрэ эйгэни, ырыаны-тойугу үрдүк категориялаах иитээччи Туяра Мартынова үөрэтэр.  Оскуолаҕа барааччыларбыт барыга олус көхтөөхтөр. Олоҥхо толорон, тойук туойан, хомуска оонньоон, ырыа ыллаан, үҥкүүлээн тэйэн өрөспүүбүлүкэҕэ, Амма улууһугар ыытыллыбыт араас таһымнаах күрэхтэр  лауреаттара, дипломаннара буолаллар. Уһуйаантан атаарыы бырааһынньыгын уһуйаан кэлэктиибэ  төрөппүттэри кытта  бэркэ тэрийдилэр.

Ирина КОРЯКИНА-ОЛЕСОВА

Читайте дальше