Амма Наахара орто оскуолатын 11 кылааһын бастыҥ үөрэнээччитэ, үөрэҕэр бары өттүнэн үрдүк көрдөрүүлээх Мирослав Романов сыллата ыытыллар Ил Дархан харыйатыгар сырытта.
Мирослав ол туһунан, олоҕор умнуллубат түгэнин маннык кэпсиир:
—Амматтан 21 буолан сырыттыбыт. Харыйаҕа өрөспүүбүлүкэ араас муннуктарыттан үөрэхтэригэр ситиһиилээх, араас таһымнаах научнай-практическай конференцияларга, куонкурустарга бастыҥ көрдөрүүлээх оҕолор кэлбиттэр. Биир дойдулаахпыт Сергей Расторгуев салайар Саха циркэтигэр ыытыллыбыт Саҥа дьыл алыптаах бырааһынньыгар Ил Дарханы көрөн-истэн, араас эҕэрдэ нүөмэрдээх бырааһынньыгы сөбүлээтим. Урукку сыллартан аҕыйах күҥҥэ тэриллибит буолан, тэрээһин түргэнник ааста, ол эрээри олус интириэһинэйдик сырыттыбыт. Элбэх атын улуус оҕолорун кытта билистим. Урукку сыллар курдук барыбытын бииргэ түһэрбиттэрэ буоллар өссө элбэх доҕордонуо этибит дии санаатыбыт. Инники былааммар биология, химия тургутууларын ааһан медицинаҕа туттарсан киирэр былааннаахпын. Үөрэнэр оскуолабар миигин маннык улахан тэрээһиҥҥэ талан ыыппыттарыгар махталбын тиэрдэбин!
Үөрэххэ оттомноох, үгүс билиилээх, саныыр санаатын сахалыы сайа этэр, аныгы олох көрдөрүүтүнэн бэйэтин бары өттүнэн сайыннарар, Өнньүөс нэһилиэгин бастыҥ үөрэнээччитигэр Мирослав Романовка баҕа санаата туолан, баҕалаах идэтигэр үөрэнэн Саха сиригэр туһалаах киһи буол диибит.
Ирина Корякина – Олесова.