Ахсынньы 20 күнүгэр Амма Наахара нэһилиэгин баһылыга Захар Александров сыллааҕы үлэтин отчуоттуур мунньаҕа буолан ааста. Нэһилиэккэ ааһан эрэр «Ийэ уонна оҕо» сыла үгүс үлэ ыытыллыбыта, улууска тэриллэр улахан тэрээһиннэргэ нэһилиэк көхтөөхтүк кыттара бэлиэтэннэ. Отчуот үлэ нэдиэлэтин бүтэһик күнэ да буоллар үгүс киһини түмтэ.
Барыта 51 киһи сырытта, сэргээтэ. Баһылык Амма Наахара нэһилиэгэ тыа сирин түөлбэтэ буолбутун иһитиннэрииттэн саҕалаата. Быйылгы отчуот сонуннук барда, баһылык Захар Семенович сүрүн көрдөрүүлэргэ тохтоон отчуотун ымпыгар-чымпыгар тиийэ сырдатта.
Нэһилиэкпитигэр араас таһымнаах субуотунньуктар күргүөмнээхтик аастылар. Быйыл хаһааҥҥытааҕар да элбэх нэһилиэк олохтооҕо кыттыыны ылла. Оттуур ходуһабыт суолун, трассаны ыраастааһын, Олоҥхо ыһыаҕар бэлэм, араас ыраастаныы, мас, муус бэлэмин субуотунньуктара буолан аастылар. Нэһилиэкпитигэр эдэр ыал олохсуйара сылтан сыл эбиллэр, үөрдэр. Ол курдук быйыл 2 ыал сокуонунан тапталларын бигэргэттилэр. Билиҥҥи туругунан биһиги нэһилиэкпитигэр 9 кырачаан дьоннор, сир симэхтэрэ эбиллиннилэр. Уонна да атын элбэх үлэ, ситиһии тэрилтэ аайы үлэлэммитин билиһиннэрдэ.
Ол кэннэ олохтоохтор интэриэһиргиир ыйытыктарын, кыһалҕалаах боппуруостарын биэрдилэр. Ол курдук, «КлиКра сокуонун» барылын туһунан, саҥа кулууп дьиэтин тутуутун, мөлтөх туруктаах уопсай дьиэлэргэ олорор дьон уруккуттан туруорсар боппуруостарын элбэх кыбартыыралаах дьиэ тутуллуутун туруорустулар. Нэһилиэккэ сибээс ситимин кыамтата мөлтөҕүн эттилэр.
Быйыл отчуот уратыта диэн нэһилиэкпит аҕа баһылыга киирээри турар сокуоннары, Дойду үрдүнэн ылыллыбыт дьаһаллары хас биирдии мунньахха кэлбит дьоҥҥо сиһилии кэпсээтэ, билиһиннэрдэ.
Олохтоохтор отчуоту сэргии иһиттилэр. Киирбит бары боппуруостарга баһылык сөптөөх хоруй биэрдэ, туруорсуулар боротокуолга киирдилэр. Мунньах түмүгүнэн нэһилиэк дьаһалтатын уонна баһылыгын сыл устата ыыппыт үлэтин биһирииллэрин биллэрдилэр.
Ирина КОРЯКИНА-ОЛЕСОВА.