Үлэ Дьоруойа П.И.Яковлев аатынан Амма Наахара орто оскуолатыгар «Көмүс күһүн» диэн тэрээһин буолан ааста. Нэдиэлэ устата үөрэнээччилэр кылаас салайааччыларын кытары айылҕалыын алтыстылар.
Күһүҥҥү тэрээһини иитэр үлэҕэ дириэктэри солбуйааччы Марина Макарова, дириэктэр сүбэһитэ Феодосия Максимова иилээн салайдылар. Күһүнүн кэрэ айылҕабыт кыһыл көмүс өҥүнэн саһарар, киэркэйэр кэмигэр, төһө да уот суох буоллар тэрээһин болдьоммут кэмигэр ыытылынна. Күммүт-дьылбыт сылаас туран биэрбит кэмигэр үөрэнээччилэр айылҕаҕа баран хаартыскаҕа түһэн, айылҕа матырыйаалыттан үөрэх кэннэ араас сэбирдэх, от-мас хомуйан нэдиэлэ биллибэккэ ааста. Ол матырыйаалларынан «Осенняя фантазия» диэн хартыына оҥорон күрэххэ кытыннылар Оҕолор төрөппүттэрин кытары сайын үүннэрбит оҕуруоттарын аһын дьикти быһыылаахтары аҕалан тэрээһиҥҥэ кэлбит дьон болҕомтотун ыллылар.
Уопсай түмүк маннык буолла: «Күһүҥҥү үөрүү» хаартыска күрэҕэр 1 миэстэни 3-с кылаас (салайааччы Айталина Филиппова), 2-с миэстэни 6-с кылаас (салайааччы Мария Яковлева), 3-с миэстэни 7-с кылаас (салайааччы Алена Мартынова) уонна 5-с кылаас (салайааччы Марина Макарова) ылан үөрүү өрөгөйүн биллилэр. Дьикти оҕуруот аһыгар кыайыылааҕынан 1-гы кылаас үөрэнээччитэ Валера Татаринов аҕалбыт «Черепаха», бэл кыра баалынан хаалбыт эмиэ бу кылаастан «Собачка» диэн ааттаммыт хортуоскалара инники күөҥҥэ таҕыстылар. Онтон 8-с кылаас үөрэнээччитэ Эрхаан Ефремов олордубут моркуоба сиамскай игирэ курдук үүнэн биирэ сырдык, биирэ оруосабай дьүһүннэнэн бэрт дьиктитик көһүннэ уонна 3-с миэстэ хаһаайына буолла. Онтон «Осенний вернисаж» аппликация күрэҕэр алын сүһүөххэ бастакы миэстэ 2-с кылаас (салайааччы Надежда Никифорова), иккис миэстэ 4-с кылаас (салайааччы Сардаана Александрова), үһүс миэстэ 1-гы кылаас (салайааччы Мария Пахомова) таҕыстылар. Орто бөлөххө бастакы 5-с кылаас салайааччы Марина Макарова, иккис 7-с кылаас (салайааччы Алена Мартынова), үһүс 6-с кылаас салайааччы Мария Яковлева буоллулар. Улахан кылаастарга инники күөҥҥэ 8 кылаас (салайааччы Людмила Александрова), иккис 9 кылаас (салайааччы Елена Кузьмина), үһүс 11-с кылаастар (салайааччы Анастасия Пахомова) ылан күһүҥҥү долгуран үөрүүтүгэр куустардылар. Дьүүллүүр сүбэҕэ технология учуутала, «Эгэлгэ» коллекционердар түмсүүлэрин салайааччыта Лариса Унарова, элбэх оҕо күн күбэй ийэтэ, тьютор Күннэй Михайлова уонна нэһилиэк кырдьаҕастарын сэбиэтин бэрэссэдээтэлэ Марианна Чен үрдүк таһымнаахтык үлэлээтилэр. Бу курдук «Көмүс күһүн» аралдьытыы тэрээһин олус тэрээһиннээхтик, көхтөөхтүк буолан ааста.
Ирина КОРЯКИНА-ОЛЕСОВА