Амма педагогтара С.Н. Донской — II аатынан үөрэҕи сайыннарар уонна идэни үрдэтэр институт тэрийбит «Кылааһы салайыы — үөрэх эйгэтин киинэ» диэн аан бастакытын ыытыллыбыт кылаас салайааччыларын өрөспүүбүлүкэтээҕи пуорумугар ситиһиилээхтик кытыннылар. Манна бастыҥтан бастыҥ кылаас салайааччылара түмсэннэр иитэр үлэ уопутун билистилэр.
Пуорумҥа пленарнай мунньах, уопуту астастаһыы, сытыы боппуруостары быһаарар, бырайыактары ырытар былаһааккалар, маастар-кылаастар, араас быыстапкалар тэрилиннилэр. Оҕону иитиигэ табыгастаах эйгэни тэрийиигэ кылаас салайааччыта куруук айымньылаахтык үлэлиэхтээҕин, маастарыстыбатын сайыннарыахтааҕын, саҥа суоллары тобулуохтааҕын туһунан элбэҕи бэлиэтээтилэр. Оҕо интэриэһин, дьоҕурун сайыннарыыга, идэтин таба тайанарыгар үлэни күүһүрдэргэ, ону тэҥэ эппиэтинэстээх, болҕомтолоох, тулуурдаах ыччаты бэлэмнээһиҥҥэ төрөппүтү кытта бииргэ үлэлииргэ санаалар этилиннилэр. Пуорум иитинэн өрөспүүбүлүкэтээҕи «Дьиэ кэргэн уонна патриотизм» кэмпириэнсийэ буолла.
«Дьиэ кэргэн уонна патриотизм: төрөөбүт дойду туохтан саҕаланарый» диэн ааттаах икки трегинэн ыытыллыбыт бастыҥ уопут марафона улахан болҕомтону тарта. Бастакы треккэ Арассыыйаҕа Дьиэ кэргэн сылынан оҕону иитиигэ бастыҥ холобурдары көрдүлэр. Манна 20 кылаас салайааччыта бэйэлэрин уопуттарын кэпсээтилэр, бырайыактарын билиһиннэрдилэр. Иккис треккэ 24 учуутал патриотизм тиэмэтигэр сыһыаннаах үлэлэринэн кытыннылар. Түмүккэ П.И.Яковлев аатынан Амма Наахара орто оскуолатын алын сүһүөх кылааһын учуутала Айталина Анатольевна Филиппова кылаас салайааччытын быһыытынан үлэтэ үрдүктүк сыаналанан кыайыылааҕынан ааттанна.
«Пленарнай чааска үөрэҕи сайыннарар уонна идэни үрдэтэр институт дириэктэрэ Ньургун Михайлович Павлов, солбуйааччыта Галина Ивановна Алексеева, үөрэх министиэристибэтиттэн департамент салайааччыта Надежда Игнатьевна Захарова, Бүтүн Арассыыйатааҕы кылаас салайааччыларын пуорумун кыттыылааҕа, Дьокуускай куорат 30 нүөмэрдээх оскуолатын дириэктэрэ Ирина Степанова Бурцева кытыннылар.
Салгыы түмэл үлэһиттэрэ оонньуу ыыттылар. Онтон үлэ уопутун үллэстэн «Дьоһуннааҕы кэпсэтиинэн» оҕолорбор 1 кылаастан саҕалаан күннүк, кэтээн көрүүнү оҥорбут үлэ уопутун кэпсээммин соһуччу бастакы миэстэ буоллум. Институт дьиэтигэр аҕыс бөлөххө арахсаммыт араас былаһааккаларынан иитэр үлэ араас хайысхаларынан, маастар кылаастарга сырыттыбыт. Бүтүн Арассыыйатааҕы пуорумҥа кыттыбыт волонтер кыргыттар арыаллыы сырыттылар. Бөлөхпөр хапытаан этим. Бастакы тэрээһин буолан барыта олус интэриэһинэй, педагогтар тугу эрэ саҥаттан саҥаны билбит киһи диэн улахан баҕалаах кэлбиттэр, онон бэртээхэй эйгэ олохтонно, кыттыбыт дьон олус астына, дуоһуйа үлэлээтибит. Пуорум сабыыллытыгар үөрэх миниистирэ Ньургууна Афанасьевна Соколова, институт дириэктэрэ Ньургун Михайлович Павлов кытыннылар уонна бу тэрээһин сыл аайы ыытыллыаҕа диэн эттилэр. Пуорум түмүгүнэн улуустарга кылаас салайааччыларыгар маннык тэрээһин ыытыллара көдьүүстээх буолуоҕа», — диэн Амма Наахара орто оскуолатын 3-с кылаас салайааччыта Айталина Филиппова санаатын үллэһиннэ.
Амма Наахара орто оскуолатын дириэктэри иитэр үлэҕэ солбуйааччыта, 5 кылаас салайааччыта, пуорум кыттыылааҕа Марина Макарова икки күннээх пуорум бэркэ аттарыллан өрө көтөҕүллүүлээхтик буолан ааспытын бэлиэтиир.
«Оҕолор интэриэстэринэн, көҕүлээһиннэринэн төрөппүттэр уонна кылаас салайааччылара бииргэ үлэлииллэрэ үтүө түмүктэри биэрэрин манна эмиэ бэлиэтээтилэр. Ханнык баҕарар кылаас салайааччыта сайаапка биэрэн, тургутугу ааһан, Бүтүн Арассыыйатааҕы пуорумҥа кыттыан сөбүн эттилэр. Кылаас салайааччылара бэйэлэрин уопуттарын, бэйэлэрин бырайыактарын икки треккэ арахсаннар кэпсээтилэр. Элбэх билиини, интэриэһинэй уопуту ыллыбыт. Холобур, Таатта лиссиэйэ быйылгыттан саҕалаан хас биирдии оҕо сайдыытын бэһис кылаастан саҕалаан оскуоланы бүтэриэҕэр диэри кэтээн көрөр бырайыагын сэҥээрэ иһиттим. Кэллиэгэм Айталина Анатольевна үлэтин уопутун олус биһирээннэр кыайыылааҕынан буолан уонна «Народное образование Якутии» сурунаалга бэчээттииргэ мэктиэлээннэр үөрүүбүт өссө үрдээтэ. Бэйэм иитэр үлэҕэ дириэктэри солбуйааччы буоларым таһынан, быйыл 5-с кылаастары ыллым, ол иһин оҕолорум оскуоланы бүтэриэхтэригэр диэри үлэлиэхтээх табыгастаах, туһалаах биир тиэмэни таламмыт бырайыак оҥостуохпут», — диэн этэр Марина Макарова .
Алтана АРТЕМЬЕВА