Амма нэһилиэгин баһылыга Михаил Артемьев Олоҥхо ыһыаҕын аһыллыытыгар анаан 80-ча атрибуту туттарда

Олоҥхобут ыһыаҕа буолара 14 хонук хаалла. Бэҕэһээ Дьокуускай куораттан ыһыах үөрүүлээх аһыллыытын туруорар режиссерскай-постановочнай бөлөх кэлэн, бүгүн күнүс 2 чаастан “Амма-Олимп” стадиоҥҥа репетициялар саҕаланаллар.


Амма нэһилиэгин баһылыга Михаил Артемьев кылаабынай режиссер Сергей Расторгуев атрибуттар наадалар диэн көрдөһүүтүн быһа гыммакка, театрализованнай көрдөрүүгэ туттуллар уопсайа 80-ча батыйаны, куйаҕы, үҥүүнү Амма нэһилиэгин дьаһалтатын кэлэктиибин уонна Ф. Потапов аатынан норуот айымньытын дьиэтин үлэһиттэрин күүһүнэн оҥороннор, бүгүн кылаабынай режиссер Сергей Васильевич көмөлөһөөччүтүгэр Фекла Попова-Колесоваҕа үөрүүлээх быһыыга-майгыга туттардылар.

Матырыйаалларын эрдэ ыламмыт, субуотунньук бэрээдэгинэн үлэ бөҕөтүн ыыттыбыт. Улахан субуотунньукка үстэ мустаммыт, ону таһынан күн ахсын соло буллубут да уһанан, оҥорон бүтэрдибит. Бүгүн үөрүүлээх түгэҥҥэ Саха циркэтин бэрэстэбиитэлигэр Фекла Петровнаҕа туттардыбыт. Бу атрибуттары оҥорорбутугар күүс-көмө, өйөбүл буолбут бииргэ үлэлиир кэллиэгэлэрбэр уонна Федот Потапов аатынан норуот айымньытын дьиэтин кэлэктиибигэр, салайааччы Петр Алексеевич Кулаковскайга махтанабын, — диэн Амма нэһилиэгин баһылыга Михаил Алексеевич санаатын үллэһиннэ.

2019 сыллаахха Саха сирин норуоттарын сэттис спортивнай оонньууларын аһыллыытыгар үлэлэспит, быйыл Олоҥхо ыһыаҕын аһыллыытыгар кылаабынай режиссер Сергей Васильевич Расторгуев көмөлөһөөччүтэ Фёкла Попова-Колесова Амма нэһилиэгин дьаһалтатыгар, баһылык Михаил Алексеевич Артемьевка махтанна:

Бэҕэһээ бэс ыйын 5 күнүгэр режиссерскай-постановочнай бөлөх хореографтар, режиссердар, музыкальнай оформление, звукорежиссер буолан кэлбиппит. Бүгүн 14 чаастан стадиоҥҥа репетициябытын саҕалыыбыт. Амма нэһилиэгин дьаһалтатыгар, чуолаан Михаил Алексеевичка маннык элбэх атрибуту биһиэхэ театрализованнай көрдөрүүбүтүгэр туттарбытыгар оҥорон күүс-көмө буолбутугар махталбыт муҥура суох. Амма дьоно-сэргэтэ сүрдээх көрсүөлэр, киһи санаатын хоту чэпчэкитик үлэлииллэр-хамсыыллар. Онон үлэбит үчүгэйдик барарыгар эрэнэбит.

Вера ИВАНОВА

Читайте дальше