Амма нэһилиэгин холбоһуктаах тэрилтэлэрин икки ардыгар комплекснай спартакиада 17 көрүҥҥэ ыытыллыаҕа. Быйыл баскетбол, ох саанан ытыы уонна буулдьа саанан ытыы күрэхтэрэ эбиллэн биэрдилэр. Маны таһынан Олоҥхо ыһыаҕын көрсө олоҥхо толоруутугар видеоролик күөн күрэһэ ыытыллыаҕа.
Бүгүн Ф. Потапов аатынан норуот айымньытын дьиэтигэр Амма нэһилиэгин өркөн өйдөөхтөрө саахымакка күрэхтэстилэр. Уопсайа 12 хамаанда кыттыбытыттан бастакы ОДьКХ, иккис ИДьМ уонна үһүс ИП холбоһуктаах хамаандалара буоллулар.
Күн бүгүн Сахавабол, остуол тенниһин, дуобат уонна саахымат күрэхтэрин түмүгүнэн урбаанньыттар хамаандалара эрэллээхтик инники күөҥҥэ таҕыста. Кинилэр кэннилэриттэн тилэх баттаһан Олох-дьаһах коммунальнай хаһаайыстыбатын хамаандата иһэр. Салгыы ИДьМ уонна улуус дьаһалтатын хамаандалара тураллар. Биэтэк билигин да ыраах, онон миэстэлэр халбас харатын курдук уларыйа тураллар. Мантан саас “Сааскылаана” кэрэ куолар, хайыһар, муус аннынан балыктааһын, бильярд, “Битва ансамблей”, хабылык, хаамыска, оһуокай, эстафета, аны күһүн ох саанан ытыы, мини-футбол, баскетбол уонна буулдьа саанан ытыы күрэхтэрэ тэриллиэхтэрэ.
Манна даҕатан эттэххэ, бириис пуондата 225 000 солк. тэҥ, ол эбэтэр бастаабыт хамаанда 100 000 солк., иккис 75 000 солк. уонна үһүс 50 000 солк. наҕараадаланыахтара.
Вера ИВАНОВА