Бүгүн Арассыыйаҕа физкультурник күнэ. “Амма-Олимп” стадионугар бу күҥҥэ анаммыт араас спортивнай тэрээһиннэр ыытылыннылар.
Стадиоҥҥа кэлбит, бэйэлэрин доруобуйаларын бөҕөргөтүнэр баҕалаах дьону Амма улууһун спортка управлениетын салайааччыта Дмитрий Наумов, Амма нэһилиэгин баһылыга Михаил Артемьев эҕэрдэлээтилэр, “Дьулуур” XIV спорт адаптивнай көрүҥэр ситиһиилээхтик кыттыбыт спортсменнары бэлиэтээтилэр.
Бу күн баскетболга, ох саанан ытыыга, хаалыктаах хаамыыга, стритболга маастар-кылаастар ыытылыннылар, гроссмейстер Андрей Федотов биир бириэмэлээх сеанс биэрэн үгүс киһи бэйэтин холонно. Мантан киэһэ футболга доҕордуу көрсүһүү ыытыллыаҕа. Тэрээһин сүрүн сыалынан ыччаты чөл олоххо тардыы, спорка тапталы иҥэрии буолар.
Ааптар: Артем Осипов