Бу нэдиэлэ биир бэлиэ түгэнэ атырдьах ыйын 15 күнүгэр Российскай Федерация сенатора Егор Борисов 70 сааһын туолла. Үбүлүөйдээх бэлиэ күнү көрсө Егор Афанасьевич төрөөбүт түөлбэтигэр Чурапчы улууһугар суруналыыстар десаннара тэрилиннэ.
Ааспыт нэдиэлэҕэ улууспут биир бөдөҥ, тутаах хаһаайыстыбатыгар “Болугур” ТХПК сайылыктарыгар тахса сырыттыбыт. Болугурдар быйыл икки сиринэн Амма өрүһү өҥөйө олорор кэрэ көстүүлээх Тас хочоҕо ньирэйдэри көрөллөр, Дьоруой Дьуонабыс үлэлээн-хамсаан ааспыт Липпэлээҕэр үрүҥ илгэни үрүйэлии сүүрдэллэр.
Маны таһынан улуус биир бөдөҥ нэһилиэгин тутаах тэрилтэтигэр үрүҥ илгэни сылы эргиччи туталлар. Бүгүҥҥү күн туругунан күннэтэ 2500 киилэ үүт астанан сип-сибиэһэй суорат, чөчөгөй, арыы Болугур уонна Амма Наахара нэһилиэнньэтигэр атыыга тахсар.
Болугурдааҕы арыы сыаҕын маастара Александра Назарова
Хаһыат үһүс балаһатыгар кылаабынай эрэдээктэр Наталья Бубякина Чурапчы улууһугар тэриллибит пресс-десантан бэлиэтээһиннэрэ киирдилэр. Егор Афанасьевич төрөөбүт, улааппыт улууһугар тиийэн, бэйэтин кытта сирэй көрсөн олорон кэпсэттилэр.
Егор Борисов төрөөбүт дьиэтэ
Оҕо сааһы санатар ампаар
Сайыҥҥы сынньанар сиргэ ирэ-хоро сэһэргэстибит
Улуу Кыайыы 80 сылын көрсө «Ким да умнуллубат, туох да умнуллубат!» рубрикаҕа улуус архыыбын кытта “Саллаат суола” бырайыакпытыгар бүгүн Болугур нэһилиэгиттэн төрүттээх Аҕа дойду Улуу сэриитин бэтэрээнэ Егор Дьячковскай ахтыыта таҕыста.
1945 сыл ыам ыйын 9 күнүгэр «кыайыы», «ураа» дииллэр. Ити сарсыарда биэс чаас этэ. Оҕо, дьахтар бөҕө мустубут, сорох сыллыыр, сорох ытыыр, ас-сибэкки бөҕөтө аҕалбыттара. Оҕолуун, улаханныын «ураа» да «ураа». Биһиги сытар дьон түннүгүнэн көрдөхпүтүнэ салют бөҕө. Ол салюту көрдөрөөрү сытар дьону барытын наһыылканан таһырдьа таһаарбыттара. Биһиги эмиэ сытан эрэ «ураа» хаһыы бөҕөбүт. Үрдүбүтүнэн самолеттар «Сталин Слава» диэн сурук буолан көтөллөрө. Мин киһи буолбутум тухары онно үөрбүтүм курдук олох суох, — диэн Егор Романович ахтыытыгар суруйбут.
Быйыл улууска Олоҥхо сылынан Сэбиэскэй былаас, гражданскай сэрии актыыбынай кыттыылааҕа, кыһыл бартыһаан, салайааччы Софрон Кутургуин өссө устар ууну сомоҕолуур уус тыллаах-өстөөх норуот ырыаһытын, олоҥхоһут быһыытынан биллэрэ. Бу туһунан сиэнэ Василиса Степанова киэҥ ис хоһоонноох суруйуута бэчээттэннэ.
Быйыл кыһын эһэбит хос сиэнэ, ХИФУ научнай бибилэтиэкэтин үлэһитэ Марианна Петровна Степанова, 1946 сыллаахха бэчээттэммит “Ленин – Сталин туһунан” кинигэҕэ саха биллиилээх бэйиэттэрэ Эллэй, Тимофей Сметанин, Күннүк Уурастыырап, Абаҕыыныскай, Чаҕылҕан, Хара, Бэрияк, Г.Е. Дьячковскай, ону кытта норуот ырыаһыттара Николай Степанов, Уот Хойостоон, Софрон Кутургуин айымньылара бэчээттэммиттэрин булан ылбыта. Кинигэҕэ Софрон Евграфьевич “Сэдир ыһыах алгыһа” диэн ааттаах алгыһа бэчээттэммит, — диэн сиэн Василиса Степанова ахтыытыгар суруйар.
Вера ИВАНОВА