Балаҕан ыйын бастакы нэдиэлэтэ түмүктэннэ. Быйыл сааспыт да, сайыммыт да сүөһү, сылгы аһын бэлэмнээһиҥҥэ кэккэ уустуктары үөскэттэ. Айылҕабыт барахсан хайдах эрэ тыа хаһаайыстыбатын эйгэтигэр тургутууну ыытар курдук. Саас ыһыы кэнниттэн, сайын от үүнүүтүн кэмигэр ардаан биэрбэтэҕэ, кураан күн-дьыл турбута. Ол да буоллар, улуус тиэрдиллибит 28915 туонна от былаанын 75% толорон, сүөһү да, сылгы да ахсаанын энчирэппэккэ сыл таһаарар соруктаах.
Маннык кураан дьылга эбии аһылык бэлэмэ биир сүрүн оруолу ылар. Быйыл улуус үрдүнэн 1900 туонна сиилэс уонна 1300 туонна сенаж бэлэмнэниллиэхтээх. Атырдьах ыйын 29 күнүнээҕи туругунан 2000 туонна сиилэс угуллан, былаан 105 бырыһыан туолбут. Оттооһун, хомуур үлэлэрин туһунан сиһилии хаһыат үһүс балаһатыгар «Кыстыыр ас баар буолуо дуо?» диэн кылаабынай эрэдээктэр Наталья Бубякина улахан матырыйаалыгар ааҕыаххыт.
Ион Кононов “Амма” АУо бурдугун бааһынатыгар хомуур үлэтин билсэр
… Сүөһү аһын бэлэмнээһин күнтэн-дьылтан улахан тутулуктаах. Билигин отчуттар да, бурдук үүннэрээччилэр да саатар нэдиэлэттэн ордук ардаабакка турдар, үлэ үмүрүйүө этэ диэн баҕа санаалаахтар. Күһүҥҥү ардахтар туох да туһаны аҕалбакка, бүтүөхтээх үлэни атахтыыллар эрэ. Баар прогноһу көрдөххө, балаҕан ыйа бүтүннүү “дьахтар сайына” суох быстах ардахтарынан туолан турар. Сүөһү, сылгы кыстык аһын бэлэмниир дьоммутугар уустук балаһыанньа. Ол да буоллар, кинилэр тиэрдиллибит соруктарын толорон, чиэстээхтик тахсыахтара диэн эрэнэбит, — диэн Наталья Егоровна баҕа санаатыгар кыттыһабыт.
Хаһыат төрдүс балаһатыгар «Мэтээл геройун булуохтаах» диэн шеф-эрэдээктэр Елена Александрова дьоҥҥо иккис олоҕу бэлэхтээбит, өлөр өлүүттэн быыһаан күн-ый буолбут Эмис нэһилиэгин олохтоохторо Николай Ноговицын уонна Остап Дмитриев тустарынан суруйда.
Эмис нэһилиэгин ытык олохтооҕо, билигин 71 сааһыгар сылдьар Николай Ноговицын хас даҕаны киһи олоҕун уһатан турар
Остап Дмитриев икки эдэр дьоҥҥо олохторун салгыыр кыах биэрбитэ геройдуу быһыы буолбатах үһү дуо?
Ууга тимирэн эрэр дьон үрүҥ тыыннарын өрүһүйбүт дьону хайаан даҕаны “Тимирэн эрэр дьону быыһаабытын иһин” мэтээлгэ түһэрэр сөптөөх дии саныыбын. Өлөр-сүтэр күҥҥэ өрүһүлтэ, быыһал-абырал буолбут саха ньургун уолаттара, ама, оннук наҕарааданы туталлара сөбө суох үһү дуо? Онон олохтоохтор, нэһилиэк баһылыга Прокопий Бубякин туруорсаннар, бу боппуруоһу тиһэҕэр тиэрдэллэрэ наада, — диэн ааптар суруйуутун түмүктүүр.
Хаһыат бэһис балаһатыгар «ППМИ – путь развития наслегов» диэн корреспондент Катерина Новикова улууска олохтоох көҕүлээһиннэри өйүүр бырагыраама нэһилиэк сайдыытыгар, дьон олоҕун тупсарыыга туһатын туһунан, итиэннэ бастыҥ үлэлээх нэһилиэктэр үтүө холобурдарын сырдатта.
Открытие сквера им. О.П. Ивановой-Сидоркевич, 2022 год
«Редакция почтатыттан» рубрикаҕа филологическай наука доктора, профессор Николай Ефремов «О потомках амгинских старожилов» диэн бэрт интэриэһинэй ыстатыйата таҕыста. Маны тэҥэ бэйиэт, Арассыыйа суруйааччыларын сойууһун чилиэнэ, Саха Өрөспүүбүлүкэтин култууратын үтүөлээх үлэһитэ, Амма улууһун бочуоттаах олохтооҕо Семен Капитонов быйыл сайын Москуба куоракка «Бэс чагда» санаторийга саха норуота сөбүлээн ыллыыр «Ньургуһуннар» ырыа мелодиятын айбыт биллиилээх литературовед, СГУ доцена Баһылай Бырдьахаанап төрөппүт кыыһа кардиология салаатын сэбиэдиссэйэ Нюргуна Васильевна Протодьяконоваҕа эмтэммитин махтанан суруйбута бэчээттэннэ.
Вера ИВАНОВА