Балаҕан ыйын 8 күнүгэр Бүтүн дойду үрдүнэн биир кэлим быыбар күнэ ыытылынна. Биһиги улууспутугар Сатаҕай уонна Чакыр нэһилиэктэригэр болдьох иннинэ баһылыктар быыбардара буолла. Түмүккэ “Биир ньыгыл Арассыыйа” политическай баартыйа кандидаттара Чакырга “Кэскил” ХЭТ зоотехнига Семен Григорьев, онтон Сатаҕайга улуустааҕы тыа хаһаайыстыбатын управлениетын салайааччытын солбуйааччы Алексей Шишигин баһылыгынан быыбарданнылар.
Ил Дархан Гранын үс төгүллээх кыайыылааҕа «Amgarun» эко-забег быйыл Арассыыйаҕа Дьиэ кэргэн сылыгар ананан ыытылынна. Тэрээһин сүрүн ыалдьыттарынан Парижка ыытыллыбыт сайыҥҥы Олимпиада кыттыылаахтара, киэн туттар биир дойдулаахтарбыт Айаал Лазарев, Владимир Егоров уонна Георгий Окороков буоллулар.
Хаһыат үһүс балаһатыгар улуус баһылыга Степан Кузьмины кытта кыстык уонна да атын тирээн турар боппуруостарынан кылаабынай эрэдээктэр Наталья Бубякина кэпсэттэ.
Оппутун 70-тан тахса бырыһыанын ыллыбыт. Түгэнинэн туһанан кураан буолла, от үүммэтэ диэн быар куустан олорон хаалбакка, ыраах үрэхтэргэ тахсан сэрбэйбити барытын оттообут, оттуу сылдьар дьоннорбутугар махталбын тириэрдэбин, — диэн Степан Николаевич махтанар.
Арассыыйа суруйааччыларын сойууһун чилиэнэ, бэйиэт Саргылана Гольдерова — Саргы Куо үбүлүөйдээх сааһыгар уйулҕа үөрэхтээҕэ Тамара Егорова бэйиэт айымньыларыгар психологическай торум оҥорбута бэчээттэннэ.
Саргы Куо хоһоонноро психотерапевтическай дьайыылаахтар, тылын күүһэ алгыстаахтар, арчылыыр аналлаахтар. Хоһоон хонуута өйү өркөннүүр, тылы имитэр, саҥаны сайыннарар аналлаахтар, бэйэтэ ЭКОтерапия буолар , — диэн Тамара Петровна ырытан суруйар.
Улуу Кыайыы 80 сылын көрсө «Саллаат суола» диэн улуус архыыбын кытта бырайыакпытыгар Арҕаа фронт кыттыылааҕа Иван Неустроев туһунан ахтыы таҕыста.
Оҕолорбор, сиэннэрбэр бу муҥур үйэҕэ, күн сиригэр биирдэ олорон ааһар олоххо чиэһинэйдик Ийэ дойдугут чэлгийэ сайдарыгар, элбэх омугу сомоҕолообут Сэбиэскэй дойдубут инники сайдыытыгар төһө кыалларынан, өй-санаа тиийэринэн үлэлииргитигэр, олороргутугар ис сүрэхпиттэн баҕарабын, — диэн Иван Иванович 1993 сыллаахха 73 сааһыгар биһиги кэккэбититтэн барыан иннинэ эппит кэс тыллара.
Улуускут хаһыатын кытта өрүү бииргэ буолуҥ, редакция почтатыгар бэйэҕит суруйууларгытын харса суох ыыталааҥ, олоҕу кытта тэҥҥэ хардыылааҥ.
Вера ИВАНОВА.