Бүгүн – Саха Өрөспүүбүлүкэтин Судаарыстыбаннаһын күнэ. Бастакы балаһаҕа Ил Дархан Айсен Николаев, Ил Түмэн дьокутааттара Александр Корякин уонна Сергей Ларионов, итиэннэ улуус баһылыга Степан Кузьмин уонна оройуон дьокутааттарын Сэбиэтин бэрэссэдээтэлэ Владимир Колосов эҕэрдэлэрэ таҕыстылар. Судаарыстыбаннас күнүнэн хаһыат анал балаһатыгар Владимир Владимирович «Хаһааҥҥытааҕар да түмсүүлээх буолуохтаахпыт» диэн дириҥ ис хоһоонноох ыстатыйата бэчээттэннэ.
Судаарыстыбаннас күнүнэн Арассыыйа Федерациятын сенатора Егор Борисов тыа хаһаайыстыбатын сайдыытыгар уонна атын да боппуруостарга санааларын кылаабынай эрэдээктэр Наталья Бубякина ыстатыйатыгар бэчээттээтибит.
Тыа сирэ, тыа хаһаайыстыбата диэн сүөһүнү, сылгыны иитии эрэ буолбатах, бу – норуот дьылҕата, — диэн этэр Егор Афанасьевич.
Маны таһынан Амма улууһун тэрийбит маҥнайгы кулуба Афанасий Рязанскай 20-с сыллардаахха Саха АССР Бырабыыталыстыбатын Наркомземын салалтатыгар үлэлээбитин туһунан олохтоох кыраайы үөрэтээччи Михаил Алексеев «Амматтан миниистир» диэн ыстатыйатын таһаардыбыт.
Манна А.П. Рязанскай салалтатынан оҥоһуллубут 1926 сыллааҕы «Сири туһаныы» балаһыанньатынан нэһилиэк хас биирдии олохтооҕо, үс саастаах оҕотуттан саҕалаан аарыма кырдьаҕастарынаан бары биир тэҥ кээмэйдээх бас билэр сирдээх буолар бырааптаахтара этиллэр. Аны бу чааһынай сирдэрин атын дьоҥҥо арендаҕа биэрэллэрэ кытаанахтык бобуллар, — диэн суруйар Михаил Васильевич.
Балаҕан ыйын 23 күнүнээҕи туругунан улууска оттооһун хаамыыта: улуус үрдүнэн 25650 туонна от охсуллан, 23290 туонна кэбиһиллэн — былаан 80,5 бырыһыан туолла.
Улуу Кыайыы 80 сылын көрсө «Киинэ нэһилиэстибэтин үйэтитэр аналлаах» диэн Москуба уобалаһын Красногорск куоратыгар харалла сыппыт саҥата суох, 10 мүнүүтэттэн тахса уһуннаах документальнай киинэ көстүбүтэ. Киинэҕэ 1944 сыллаахха Аммаҕа буолбут ыһыах үйэтитиллибитэ чуолкайдаммыта. Киинэни булууга быһаччы кыттыспыт, И.С. Жараев аатынан Саха Өрөспүүбүлүкэтин аудиовизуальнай киин пуондатын кылаабынай харайааччыта Анна Пшенникова бүгүн биһиги хаһыаппыт ыалдьыта.
Дьон чугас аймахтарын көрөн долгуйбуттарыттан бэйэбит да наһаа долгуйдубут. Холобура, бу киинэҕэ Илья Винокуров-Чаҕылҕан тыыннаах мөссүөнэ көстүбүтэ дии. Бу соҕотох кадр. Ол иһин намнар эмиэ наһаа үөрбүттэрэ. Уопсайынан, бу киинэ көстүбүтэ бэйэтэ бэрт ураты суолталаах. Тоҕо эрэ оруобуна Олоҥхо ыһыаҕа Аммаҕа ыытылларыгар көстөн кэллэ. Онон көрөн истэх аайы өссө үөрэтиллэрэ тахсан иһэр. Манна аҥардас дьону эрэ чуолкайдаан буолбакка, саха култууратын, үгэстэрин үөрэтиигэ эмиэ суолталаах, — диэн этэр Анна Владимировна.
Убаастабыллаах ааҕааччыларбыт!
Сотору кэминэн чэпчэтиилээх сурутуу декадата саҕаланар. Ол түгэни мүччү туппакка сыллааҕы хаһыакка сурутаргытыгар ыҥырабыт. Хаһан да буоларын курдук биир сылга суруппуттар 2025 сыл халандаарын тутуоххут уонна сүүйүүлээх оонньотууга кыттыаххыт. Манна даҕатан эттэххэ, хаһыат «Сандалы» маҕаһыыҥҥа уонна хаһыат эрэдээксийэтигэр атыыланар.
Вера ИВАНОВА.