Кэлэр нэдиэлэр сэрэдэтэ – Маҥнайгы Ыспааһап күнэ. Бу күнтэн саҕалаан ардахтар түһэллэр. Хотуур ортото. Бурдук хомуура саҕаланар. От-мас кэхтэн күһүҥҥү күннэр саҕаланаллар.
Хаһыат бастакы балаһатыгар Саха Өрөспүүбүлүкэтин олох-дьаһах коммунальнай хаһаайыстыбатын уонна энергетикаҕа миниистирэ Вячеслав Емельянов Амма улууһугар кэлэн ханнык эбийиэктэри көрбүтүн сырдаттыбыт. Иккис балаһаҕа нэдиэлэ сүрүн сонуннарын сэргэ от таблицата таҕыста.
ҮҺүс балаһаҕа хаһыат кылаабынай эрэдээктэрэ Наталья Бубякина «Кураантан ууну таба туһаныы эрэ абырыа» диэн ыстатыйатыгар улуус баһылыга Степан Кузьмин сүөһү кыстык аһын бэлэмнээһиҥҥэ салайан ыыппыт мунньаҕыттан бэлиэтээһиннэрэ, итиэннэ тыа хаһаайыстыбатын миниистирин солбуйааччы Сахаяна Павлова санаалара киирдилэр.
Амма саамай элбэх улахан тэрээһиннээх хаһаайыстыбалаах улуус буолар. Мунньахха улуус салалтата, нэһилиэктэр, хаһаайыстыбалар да оттооһуну күүскэ ыытар санаалаахтарын, талах да төрдүн оттоон, от арыый үүммүт нэһилиэктэрэ былааннарын 100% толороллоругар сорудах турбутун үөрэ иһиттим. Тыа хаһаайыстыбатын министиэристибэтэ да туора турбат. Сөптөөх көмөлөр баар буолуохтара. Биһиги билигин күннэтэ от хампаанньата хайдах баран иһэрин кэтээн көрө олоробут. Төһө да ыарахан кэмнэр кэллиннэр, бары бииргэ үлэлээн кыстыкпытын этэҥҥэ туоруохпут диэн баҕа санаалаахпыт. Амма саамай иҥэмтиэлээх буордаах улуус буолар. Маннык өҥ буордаах улуус өрөспүүбүлүкэҕэ суох, — диэн Сахаяна Афанасьевна этэр.
Быйыл – Амматааҕы Хойуу учаастагар үлэ-сынньалаҥ лааҕыра тэриллибитэ 45 сыла. Онон сибээстээн Хойуу биригээдэтигэр оҕолорго наставник-оҕуруотчутунан үлэлээбит үлэ бэтэрээнэ Марфа Харитонова «Элбэх оҕо үлэҕэ хатарыллан тахсыбыта» диэн элбэх хаартыскалардаах истиҥ ахтыыта бэчээттэннэ.
Оҕо үлэтэ сүрдээҕин сыаналанара. Биригээдэбит да, сопхуос да оҕону олус өйүүрэ. Үчүгэй үлэлээх оҕолор Бочуотунай грамоталарынан, Махтал суруктарынан бэлиэтэнэллэрэ, бэлэх да ылаллара. Үһүс сезон бүтүүтэ биһиги, үлэһиттэр, хас биирдии оҕоҕо оҕуруот астаах набор оҥорон түбүгүрэрбит. Оҕолор дьиэлэригэр оҕурсу, помидор, хаппыыста, укроп, редиска, луук кэһиилээх баралларыттан ордук үөрэр курдуктара, — диэн Марфа Алексеевна ахтар.
Сэттис балаһаҕа хаһыаппыт эрэллээх ааҕааччыта, үөрэх управлениетын салайааччытынан үлэлээбит Михаил Жирков «Оҕону үлэнэн иитии кыһалҕалара» диэн суруйуута таҕыста.
Вера ИВАНОВА